Aqmola oblysynda 25 eldi mekendi sý basý qaýpi bar
Bul týraly Aqmola oblysy Tótenshe jaǵdaılar departamentiniń bastyǵy Nurlan Atyǵaev málim etti, dep habarlaıdy QazAqparat tilshisi.
Departament basshysynyń aıtýynsha, aımaqta sý tasqynyna daıyndyq sharalary ótken jyldyń jazynda bastaldy.
«2021 jylǵy 25 mamyrdaǵy ınjenerlik qorǵaý boıynsha josparǵa sáıkes, 53 eldi mekende 35 shaqyrym sý burý arnalaryn abattandyrý jáne tazalaý, sondaı - aq 22 shaqyrym ózen arnalaryn tazartý, nyǵaıtý, topyraq úıindilerinen bóget turǵyzý, 10,9 shaqyrym bógetti jóndeý, 47 sý ótkizý qurylystaryn ornatý jáne jóndeý boıynsha jumystar júrgizildi. Degenmen, qazirgi tańda aýa raıy jaǵdaıyna baılanysty 4 060 adam turatyn 25 eldi mekende sý basý qaýpi joǵary deńgeıde», - dedi Nurlan Atyǵaev.
Vedomstvo basshysy atap ótkendeı, yqtımal tótenshe jaǵdaı kezeńine oblysta 1,6 mıllıard teńgeden astam qarajat qarastyrylǵan.
«Aýdan ákimdikteri tarapynan óńirlerde 246 tonna janar-jaǵar maı, 17,2 myń tonna ınertti materıaldar, 76,8 myń qap daıyndaldy. Osy baǵyttaǵy jumystar jalǵasýda. Oblystyń eldi mekenderinen 526 myń tekshe metrden astam qar shyǵaryldy. Qar qoryn qurý jáne shyǵarý jumystary jalǵasýda», - dep departament basshysy.
Sonymen birge, gıdrotehnıkalyq qurylystardy sý tasqyny jumystaryna daıyndaý boıynsha josparly is-sharalar júrgizilýde. Astana, Sileti jáne Shaǵalaly sý qoımalarynyń rejımin retteýge erekshe kóńil bólinip otyr.
«Sý tasqyny bola qalǵan jaǵdaıda TJD jeke quramynan 445 adam, 84 tehnıka, 12 júzý quraly, 97 motopompa jumyldyrylatyn bolady. Sý tasqyny jaǵdaıy kúrdelengen jaǵdaıda TJD kúshteri men quraldaryn kóshirý josparlanýda. Sondaı - aq, basqa oblystardan kómek kúshi tartylady», - dep túıindedi Nurlan Atyǵaev.
