Aqmola oblysynda 244 medıtsına qyzmetkeri jetispeıdi
Brıfıngte aıtylǵandaı, oblystyń densaýlyq saqtaý júıesinde memlekettik medıtsınalyq uıymdarynda 6946 medıtsına qyzmetkeri, onyń ishinde 1498 dáriger jáne 5448 orta medıtsına qyzmetkeri eńbek etedi. Óńirde 244 medıtsına qyzmetkeri jetispeıdi.
«Búgingi tańda medıtsına kadrlaryn yntalandyrý maqsatynda birqatar júıeli sharalar qabyldanýda. Medıtsına qyzmetkerleriniń jalaqysy, dárigerlerge 30 paıyzǵa jáne orta medıtsına qyzmetkerlerine 20 paıyzǵa artty. Medıtsına qyzmetkerlerine jataqhanalar berý, jaldaý tólemderin birlesip tóleý, balabaqshalardan oryndar bólý, erli-zaıyptylardy jumysqa ornalastyrý arqyly áleýmettik qoldaý qamtamasyz etiledi. Baspanaǵa muqtaj 53 jas mamannyń 39-y baspanaǵa ıe boldy. Onyń ishinde 13 dáriger ákimdikter esebinen, 23 - i medıtsınalyq uıymdar esebinen, 3 - i demeýshiler esebinen turǵyn úımen qamtamasyz etildi. 74 medıtsına qyzmetkeri turǵyn úı satyp alýǵa 320,1 mıllıon teńge nesıe aldy», - dedi N.Syzdyqov.
Sonymen birge, basqarma basshysy atap ótkendeı, óńirde medıtsına qyzmetkerleri úshin turǵyn úı qurylysy men jóndeý jumystary júrgizilýde. Oblys ortalyǵynda medıtsına qyzmetkerleri úshin 40 páterli úı salyndy. Egindikól aýdanynda medıtsına qyzmetkerlerine arnalǵan 8 oryndyq jataqhanaǵa kúrdeli jóndeý júrgizildi. Atbasar aýdanynda bos turǵan ǵımarattardyń biri 30 oryndyq jataqhanaǵa qaıta beıimdeldi. Jaqsy aýdanynda 8 páterli turǵyn úı salyndy.
«Medıtsına qyzmetkerlerine 1 mıllıon teńgeden bastap kóterme járdemaqy tóleý qarastyrylǵan, bul óz kezeginde aýyldyq jerlerde medıtsına kadrlaryn tartýǵa jáne bekitýge yqpal etedi. Búgingi kúni 20 adamnan ótinimin qabyldandy. Medıtsınalyq uıymdardyń qarajaty esebinen 20 jas mamanǵa jalpy somasy 5,5 mıllıon teńgege 200 myń teńgeden 1 mıllıon teńgege deıin tólem júrgizildi», - dep atap ótti N.Syzdyqov.
«Dıplommen aýylǵa!» jobasy sheńberinde 2021 jyldyń 1 qarashasyna 100 aılyq eseptik kórsetkish kóleminde 153 medıtsına qyzmetkerine jalpy somasy 44,6 mıllıon teńgege kóterme aqy tólendi.
Dáriger kadrlardyń tapshylyǵyn tómendetý úshin jyl saıyn rezıdentýrada oqýǵa 35 grant, «Jalpy medıtsına» mamandyǵy boıynsha oqýǵa 50 grant bólinedi, orta býyn medıtsına qyzmetkerleri úshin jergilikti bıýdjet esebinen 190 grant, respýblıkalyq bıýdjetten 20 grant, «Eńbek» nátıjeli jumyspen qamtýdy jáne jappaı kásipkerlikti damytý baǵdarlamasy boıynsha 50 grant jáne aýdan ákiminiń 1 granty bólinedi.
