Aqmola oblysynda 242 túlek mektepti «Altyn belgige» aıaqtady
KÓKShETAÝ. QazAqparat - Kókshetaý qalasynda Abylaı han alańynda ótken saltanatta úzdik mektep túlekterine «Altyn belgiler» tapsyryldy, dep habarlaıdy QazAqparat tilshisi.
Saltanatty sharaǵa aımaq basshysy Ermek Marjyqpaev qatysty. Ol mektep bitirýshi túlekterge «Altyn belgiler» men úzdik attestattardy, sonymen qatar 100 jáne 80 myń teńge aqshalaı sertıfıkattar tabys etti.
«Sizder mańyzdy, jaýapty sheshimder qabyldaý aldynda tursyzdar. Sizder jassyzdar, kúsh-qýat pen bolashaqqa úlken josparlarǵa tolysyzdar. Búgin Qazaqstannyń Prezıdenti Qasym-Jomart Toqaev ulyqtaý rásiminde atap ótkendeı, sizderdiń aldaryńyzdaǵy elimizdiń damýyna qosatyn úlesterińiz zor. Elbasy 2019 jyldy Jastar jyly dep jarııalady. Sizderdiń eń úlken armandaryńyzdy júzege asyryp, jeke jetistikterge qol jetkizý úshin kóp múmkindikter jasalady», - dep atap ótti oblys ákimi.
Ermek Marjyqpaev jastarǵa aldyna maqsat qoıyp, ómirde kezdesetin qıyndyqtardan qoryqpaýǵa shaqyrdy. Sonymen qatar, oqýshylarǵa qajetti bilim berip qana qoımaı, óz is-áreketine jaýap berýge barlyq kúsh-jigerimen tyrysqan muǵalimderdiń eńbegine erekshe toqtaldy.
Quttyqtaý rásimi dástúrli vals bıimen jáne túlekterdiń qoshtasý fleshmobymen aıaqtaldy.
Aıta keteıik, bıylǵy jyly Aqmola oblysynda 4606 túlek mektepti bitirdi, onyń 242-i «Altyn belgi», 175-i úzdik attestat ıegeri. 2018-2019 oqý jylynyń qorytyndysy boıynsha oblystyń 710 oqýshysy oblystyq, respýblıkalyq jáne halyqaralyq olımpıadalardyń jeńimpazy atandy. Onyń 18-i bıylǵy jylǵy mektep bitirýshiler. Olardyń deni ál-Farabı atyndaǵy Qazaq ulttyq ýnıversıtetiniń, Nazarbaev Ýnıversıteti men basqa da JOO-lardyń oqý granttaryna ıe boldy.
