Aqmola oblysynda 214 túlekke «Altyn belgi» tapsyryldy
KÓKShETAÝ. QazAqparat - Aqmola oblysynda 214 túlekke «Altyn belgi» tapsyryldy, dep habarlaıdy «QazAqparat» HAA tilshisi.
Aımaq basshysy Málik Myrzalın Kókshetaý qalasyndaǵy Táýelsizdik alańynda «Sát sapar, túlekter - 2017!» taqyrybynda ótken saltanatty jıynǵa qatysyp, altyn uıa aıaýly mektepten túlep ushqan ul-qyzdardy quttyqtady.
«Bul kúnde Qazaqstan qoǵamdyq turaqtylyqtyń, ekonomıkasy men saıası júıesi qarqyndy damyǵan jáne qalyptasqan jańa memlekettiń jarqyn úlgisi bolyp otyr. Bul Elbasynyń kóregendiligi men salıqaly saıasatynyń arqasynda ekendigi sózsiz. Bıylǵy jyl el júregi Astana qalasynda ótip jatqan «EKSPO - 2017» mamandandyrylǵan kórmesimen erekshelenip otyr. Qazaqstanda oqımyn degen jastarǵa bilimniń dańǵyl joly ashyq. Bolashaqta bilikti maman bolyp qalyptasyp, óz elin súıetin eljandy, parasaty bıik urpaq retinde egemendi elge aıanbaı ter tógetinderińizge senimim zor»,-dedi óńir basshysy óz sózinde.
Saltanatty sharada Kókshetaý qalasyndaǵy №5 «Tańdaý» kópsalaly gımnazııasynyń túlegi, «Úzdik attestat» ıegeri Inýr Maratova óziniń aqjarma tilegin úsh tilde jetkizdi. Kókshetaý qalasy boıynsha 56 «Altyn belgi» ıegerine 100 myń teńge kóleminde, 24 «Úzdik attestat» ıegerine 70 myń teńge kóleminde sertıfıkattar tabys etildi.
Aıta ketý kerek, bıyl Aqmola oblysy boıynsha 4331 túlek altyn uıa mektepterinen túlep ushty. Onyń 214-i «Altyn belgi», 97 bala úzdik attestat ıegeri.
