Aqmola oblysynda 2014 jylǵa deıin balabaqsha máselesi sheshimin tabady
KÓKShETAÝ. Aqpannyń 1-i. QazAqparat /Janmurat Janaıdarov/- Elbasynyń Qazaqstan halqyna «Jańa onjyldyq-jańa ekonomıkalyq órleý-Qazaqstannyń jańa múmkindikteri» atty Joldaýynda aldaǵy onjyldyqta barlyq balalar mektep jasyna deıingi tárbıe berý jáne oqytýmen qamtylatyndyǵy atap kórsetilgen.
Aqmola óńirinde bul másele 2014 jylǵa deıin sheshimin tappaq, dep habarlaıdy QazAqparat tilshisi oblys ákiminiń baspasóz qyzmetine silteme jasap.
Joldaýda belgilengen mindetterge oraı, 2010-2015 jyldary memlekettik qarjy esebinen 1510 oryndyq 34 balabaqsha, oblystyq bıýdjet arqyly 38 mektep jasyna deıingi mekeme, jalpy bilim beretin mektepter janynan 101 shaǵyn balabaqshalar ashý kózdelip otyr. Búginde aımaqta júz mektep jasyna deıingi mekemede 12 myń 39 balǵyn tálim-tárbıemen qamtylsa, áli de 12 234-i óz kezegin kútýli. Tek Kókshetaý qalasynda 6 375 bala, Stepnogorda -1 374, Şýchede - 800, Atbasarda - 705 sábı kezekke qoıylǵan. Jalpy oblys boıynsha balǵyndardyń 41,5 paıyzy mektep jasyna deıingi tárbıe isimen qamtylyp otyrǵan kórinedi. Bul rette Arshaly, Jarqaıyń, Jaqsy, Egindikól aýdandarynda ózekti másele sheshimin taýyp keledi. Aldaǵy úsh jylda jekemenshik alty bala baqsha ashý kózdelýde. Olarda 300 jetkinshek ornalaspaq. Bul týrasynda Kókshetaý qalasynda, Arshaly, Býrabaı, Tselınograd aýdandarynda jobalaý jumystary qolǵa alynǵan.
