Aqmola oblysynda 18 jastaǵy jigitti kólik qaǵyp, mert qyldy
KÓKShETAÝ. QazAqparat – Aqmola oblysynyń Tselınograd aýdanynda 18 jastaǵy jigitti kólik qaǵyp, mert qyldy, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinshe, aǵymdaǵy jyldyń 2 maýsymynda Nur-Sultan qalalyq PD jedel basqarý ortalyǵynyń kezekshi bólimine Talapker aýylynyń aýmaǵynda «Almaty-Ekaterınbýrg» avtojolynyń 1237 shaqyrymynda «Toyota Camry» markaly avtokóligi jaıaý júrginshini qaǵyp ketkeni týraly telefon habarlamasy tústi.
«Anyqtalǵandaı, Nur-Sultan qalasyna baǵyt alǵan 20 jastaǵy astanalyq joldy ruqsat etilgen tusynan baǵdarshamnyń jasyl túsine ótip bara jatqan Talapker aýylynyń 18 jastaǵy turǵynyn qaǵyp ketti. Jas jigit oqıǵa ornynda kóz jumdy», - dedi vedomstvodan.
Qazirgi kezde, kólik júrgizýshisiniń ústinen Qylmystyq kodekstiń 345 babynyń 3-shi bóligi «jol qozǵalysy erejelerin buzý» boıynsha sotqa deıingi tergeý sharalary júrgizilýde. Sonymen birge, oǵan «kúzetpen ustaý» bultartpaý sharasy tańdaldy. Tergeý amaldary jalǵasýda.
