Aqmola oblysynda 18 jastaǵy jigit iz-túzsiz joǵalyp ketti
KÓKShETAÝ. QazAqparat – Aqmola oblysynda iz-túzsiz joǵalǵan 18 jastaǵy Rahat Muqashevke izdeý jarııalandy, dep habarlaıdy QazAqparat tilshisi oblystyq PD silteme jasap.
Vedomstvonyń málimetinshe, tamyzdyń 27-de Astrahan aýdandyq PB kezekshilik bólimine 55 jastaǵy jergilikti turǵyn habarlasyp, 2002 jyly týǵan uly Rahat Janbatyruly Muqashevti izdep tabýǵa kómek suraǵan.
Ákesiniń sózinshe, uly 2020 jyldyń 25 tamyz kúni túngi 00:50 shamasynda kıimin jınap, úıinen ketip qalǵan.
Anyqtalǵandaı, tamyzdyń 24-de ol qujattaryn qorǵanys bólimine tapsyryp, úıinde bolǵan. Kóńil kúıi bolmaǵandyqtan eshkimmen sóılespeı, telefonyn qarap otyrdy.
Tańerteń turǵanda anasy Rahattyń úıde joǵyn anyqtaǵan. Buǵan qosa, ol jeke zattaryn, jeke kýáligi, 40 myń teńge aqsha, sómkesine salynǵan kıimi, uıaly telefonyn birge alyp ketken.
«Beınebaqylaý kamerasyndaǵy jazbalardy tekserý kezinde ol tamyzdyń 25-de túngi saǵat 01:05 shamasynda Astrahan aýylyndaǵy avtostantsııa jolyna shyǵyp, «Ekaterınbýrg-Almaty» baǵytyndaǵy tasjolda ketip bara jatqan belgisiz kólikke otyrǵany anyqtaldy. Qazirgi kezde Rahattyń uıaly telefony sóndirýli. Alaıda, Nur-Sultan qalasynyń volonterleri onyń 26 tamyz keshki saǵat 22:00 shamasynda «Mahabbat» turǵyn úı kesheni aýmaǵyndaǵy oryndyqta otyrǵanyn kórgen» deıdi vedomstvodan.
Rahattyń boıy - 171 sm, dene bitimi - myǵym, shashy - qara, qysqa qıylǵan, kózderi qońyr, qulaǵy qalqıǵan. Ústine qara-kók juqa kúrte, qara tústi trıko, qara tústi krossovka kıgen.
Ózimen birge qara-qońyr tústi sómke jáne «Redmı» uıaly telefony bar. Ony kórgen adamdar Aqmola oblysynyń Astrahan aýdandyq PB (8-71641) 2-21-81, 8-705-423-52-07 nemese «102» arnaıy jelisne habarlasa alady.
