Aqmola oblysynda 17 sáýirde sanıtarlyq tazalaý men kógaldandyrý aılyǵy bastalmaq
ASTANA. QazAqparat - Búgin oblys ákimdiginde óńir basshysy Málik Myrzalınniń tóraǵalyǵymen sý tasqynynyń aldyn-alý sharalary men oblystyń eldi mekenderin abattandyrý máseleleri boıynsha apparattyq jınalys bolyp ótti.
Tasqyn sýdyń aldyn-alý jónindegi jasalyp jatqan is-sharalar týraly oblystyq tótenshe jaǵdaılar boıynsha departamenti bastyǵynyń orynbasary Manarbek Shapaǵatov málimdedi.
Onyń málimeti boıynsha óńirde 11,8 shaqyrym kanaldar arshylyp, 32,2 shaqyrym aryqtardyń bógetteri jóndelgen. Oǵan qosa, 13 sý ótkizý qondyrǵylary bekitilip, 1,6 shaqyrym jerge úıindi bógetter turǵyzylǵan, 190 m aýmaqta jaǵalaýlar men ózen aǵysyn bekitý jumystary júrgizilgen. Osyǵan qaramastan búginde Astrahan, Arshaly, Atbasar jáne Tselınograd aýdandarynda qaýip deńgeıi joǵary.
«Oblystyń qalalar men aýdandaryndaǵy jergilikti atqarýshy organdary men azamattyq qorǵanys júıesi qalaıda tótenshe jaǵdaıdy boldyrmaýdyń aldyn alýda», - dedi Shapaǵatov.
Baıandamashynyń málimetin tyńdaǵan óńir basshysy aýdandar men qala ákimderine tez arada jaýyn kárizderin, sý aǵatyn aryqtar, ózen aǵystaryn qoqystan jáne qar sýynan tazartyp, sý deńgeıi men gıdrotehnıkalyq qondyrǵylardy turaqty baqylaýda ustaýdy tapsyrdy.
Oǵan qosa, aımaq basshysy múddeli memlekettik organdarǵa buqaralyq aqparat quraldary arqyly, onyń ishinde áleýmettik jeli arqyly, turǵyndar arasynda sý tasqynynyń aldyn alý sharalary boıynsha túsinik jumystaryn júrgizýdi júktedi.
Sondaı-aq jınalys barysynda 17 sáýir - 20 mamyr aralyǵynda oblys boıynsha ótetin sanıtarlyq tazalaý, kórkeıtý jáne kógaldandyrý jumystarynyń daıyndyq barysy da pysyqtaldy.
«Aǵymdaǵy jyly jol jóndeý, sanıtarlyq tazartý, aımaqtardy abattandyrý men kógaldandyrýǵa bıýdjetten 3,0 mlrd teńge qarajat bólingen. Osy baǵyttaǵy jumystar bastalyp ketti», - dep málimdedi Aqmola oblystyq energetıka jáne turǵyn úı-kommýnaldyq sharýashylyǵy basqarmasynyń basshysy Vıktor Radchenko.
Óz kezeginde Aqmola oblystyq tabıǵı resýrstar jáne tabıǵatty paıdalanýdy retteý basqarmasynyń basshysy Rýslan Áýbákirov oblysta 3 orman pıtomnıkteri bar ekendigin, olarda búgingi kúni 13 mln. túp kóshet ósirilip jatqandyǵyn jetkizdi.
«Búgingi kúni oblystyń batys bóligin aǵash kóshetterimen qamtamasyz etý úshin taǵy bir orman pıtomnıginiń jobalyq-smetalyq qujattamasy daıyndalýda. Bıylǵy kóktemde 96 myń danadan astam aǵash kóshetteri otyrǵyzylyp, 1700 gektar aýmaqty ormanǵa aınaldyrýdy kózdeýdemiz», - dedi ol.
Osy másele boıynsha Myrzalın sharýashylyq sýbektilerin, qoǵamdyq ujymdar, kommertsııalyq qurylymdar, turǵyndardy tartý boıynsha jumystardy belsendirýdi tapsyrdy.
«Astana mańyndaǵy aýmaq bolǵandyqtan biz óz bedelimizge saı bolýymyz kerek. Ár aýdan, qala ákimderi ózderine senip tapsyrylǵan aýmaqtyń tazalyǵy men syrt kelbetin qadaǵalap otyrýlary kerek. Bul másele erekshe baqylaýda bolsyn», - dedi óńir basshysy.
