Aqmola oblysynda 17 myń oqýshyǵa kómek kórsetiledi

KÓKShETAÝ. QazAqparat – Aqmola oblysynda jańa oqý jylynda áleýmettik jaǵynan az qamtylǵan otbasylardaǵy 17 myń oqýshyǵa oqý-jazý quraldaryn, kıim jáne aıaqkıim satyp alýy úshin jalpy bilim berý qory esebinen kómek kórsetiledi. Bul týraly aımaq basshysy Ermek Marjyqpaev tikeleı efır arqyly ótken brıfıngte aıtty, dep habarlaıdy QazAqparat tilshisi oblystyq ishki saıasat basqarmasyna silteme jasap.

Vedomstvonyń málimetinshe, bıylǵy jyly áleýmettik jaǵynan az qamtylǵan otbasylardaǵy 17 myń oqýshyny qoldaý úshin 300 mıllıon teńgeden astam qarajy bólinedi.

Aımaq basshysy atap ótkendeı, elimizde jyl saıyn «Mektep jol» aktsııasyn ótkizý dástúri qalyptasqan. Ótken jyly áleýmettik bastama jyldyq formatqa kóshirildi. Osy rette, jergilikti kásipkerler de ortaq ıgi iske qol ushyn sozýda. Byltyrǵy jyly 16 463 oqýshy kómek aldy. Onyń jartysyna jýyǵyn halyq qalaýlylary qarjylandyrdy. Bıyl da solaı bolmaqshy.

«Osy maqsatta jyl saıyn bıznes-qoǵamdastyǵyndaǵy metsenattar jáne Aqmola oblysynyń belsendi azamattary esebinen shamamen 250 mıllıon teńgege jýyq qarjy bólinedi», - dep atap ótti Emek Marjyqpaev.