Aqmola oblysynda 16 adamnyń ólimi órtten bolǵan
KÓKShETAÝ. QazAqparat - Aqmola oblysynda jyl basynan beri 16 adam órtten kóz jumdy.
Bul týraly búgin óńirlik kommýnıkatsııalar qyzmetinde ótken baspasóz máslıhaty barysynda Aqmola oblystyq TJD órtke qarsy qyzmetiniń basshysy Denıs Shelkoplıasov málim etti, dep habarlaıdy QazAqparat.
Onyń aıtýynsha, 2016 jyldyń basynan oblys aýmaǵynda barlyǵy 563 órt oqıǵasy tirkelgen.
«Jylý berý maýsymy kezinde órt qaýipsizdigi erejesiniń durys saqtalýy mańyzdy. Óıtpegen jaǵdaıda, adam shyǵynyna ákelip soqtyratyn qaıǵyly jaǵdaı oryn alatyny anyq. Máselen, jyl basynan beri órtten 16 adam kóz jumdy, 91 mıllıonnan astam teńgege materıaldyq shyǵyn keldi. Adam ólimi ótken jyldyń sáıkes kezeńimen salystyrǵanda birshama joǵary bolyp otyr», - deıdi D.Shelkoplıasov.
Sonymen qatar, ol ystan ýlaný oqıǵasy da órship turǵanyn atap ótti. «Oqys oqıǵalardyń deni jer úılerdegi peshterdiń aqaýy saldarynan týyndap otyr. Osy maqsatta TJD qyzmetkerleri oblys aýmaǵyndaǵy turǵyn úılerge baryp, órt qaýipsizdigi sharalaryn saqtaý jóninde eskertý jasady», - dep atap ótti D.Shelkoplıasov.
Brıfıng barysynda kóktemgi sý tasqynyn boldyrmaý maqsatynda qaýipti eldi mekender men joldardy qardan tazartý, mereke, borandy kúnderi jolǵa shyqqanda qaýipsizdik erejelerin qatań saqtaý kerektigi aıtyldy.
