Aqmola oblysynda 157 úmitker əkim bolyp saılandy
KÓKShETAÝ. QazAqparat - Aqmola oblysynda 157 úmitker əkim bolyp saılandy. Bul týraly oblystyq saılaý komıssııasynyń tóraǵasy Ádilhan Shaıahmetovtyń BAQ ókilderimen bolǵan brıfıngte aıtyldy, dep habarlaıdy QazAqparat tilshisi.
Brıfıngte ol 8 tamyzda ótken aýdandyq mańyzy bar qalalar men selolyq okrýgterdiń jáne kentterdiń ákimderin saılaýdyń qorytyndysy týraly aıtyp berdi.
Memleket basshysynyń 2013 jyldyń 24 sáýirindegi Jarlyǵyna saı, sol jyly jergilikti ákimderdi saılaý ótkizilgen bolatyn. Sol ýaqytta tórt jyl merzimge saılanǵan 246 aýyl ákiminiń 136-sy tórt jyl boıy, ıaǵnı saılaý merzimi aıaqtalǵansha jumys istegen. Kezekti saılaý bıylǵy jyldyń 8 tamyzyna belgilengen. Bul saılaýǵa 136 selolyq okrýgi boıynsha ákim bolýdan úmitker 412 adam usynylǵan. Oǵan qosa, shyǵyp qalǵan 21 aýyl ákiminiń ornyna da úmitkerler usynyldy.
Oblystyq saılaý komısssııasy tóraǵasynyń aıtýynsha, aýyl ákimderine úmitkerlerdi usyný bıylǵy jyldyń 9-13 shildesi aralyǵynda júrgizilip, 23 shildede tirkeý aıaqtalǵan. 24 shildeden 6 tamyzǵa deıin úmitkerlerdiń saılaýaldy úgit-nasıhat jumystary júrgizilgen. Aýyl ákimdiginen úmitker 459 adam tirkelip, saılaýǵa túsken. Solardyń arasynan júzden júırik shyqqan 157 úmitker ákim bolyp saılanǵan.
Aıta keteıik, aýyl ákimderin aýdandyq, qalalyq máslıhattardyń depýtattary saılaıdy. Oblysymyzdaǵy jergilikti máslıhattardyń 242 depýtatynyń 231-i , ıaǵnı 95 paıyzy daýys berýge qatysqan. Saılanǵandardyń 99-y burynnan jumys istep kele jatqan ákimder bolsa, qalǵandary jańadan saılanǵandar. Taıaýdaǵy bes kúnniń ishinde jańa saılanǵan aýyl ákimderine kýálik berilip, óz qyzmetterine kirispek.
