Aqmola oblysynda 14 jastaǵy jasóspirim sýǵa batyp ketti
KÓKShETAÝ. QazAqparat - Aqmola oblysynyń Birjan sal aýdanynda 14 jastaǵy jasóspirim sýǵa batyp ketti, dep habarlaıdy QazAqparat tilshisi aımaqtyq TJD silteme jasap.
Vedomstvonyń málimetinshe, qaıǵyly oqıǵa maýsymnyń 2-de saǵat 19:16 shamasynda Qaratal aýylynan eki shaqyrym jerdegi jasandy qazanshuńqyrynda (kólemi 10h15 metr jol jóndeý jumystary kezinde paıda bolǵan) bolǵan.
«2005 jylǵy balanyń denesin aýyl turǵyndary alyp shyqty. Kýágerlerdiń sózinshe, bala ruqsat etilmegen orynda sýǵa shomylý kezinde batyp ketken. Qutqarý jumystaryna TJD jeke quramynan 2 qyzmetkeri men 1 arnaıy tehnıkasy, Birjan sal aýdandyq PB kezekshi jedel tergeý tobynyń 2 qyzmetkeri men 1 tehnıkasy jumyldyryldy», - dedi QazAqparat tilshisine TJD baspasóz hatshysy Dınara Esenbaeva.
Sonymen qatar, TJD qyzmetkerleri sýǵa shomylýǵa ruqsat etilmegen jáne arnaıy jaraqtalmaǵan oryndarda sýǵa shomylýǵa bolmaıtyndyǵyn eskertedi. Ata-analarǵa balalardy jalǵyz kólge shomylýǵa jibermeýdi usynady.
