Aqmola oblysynda 125 eldi meken sý basýy múmkin aımaqta ornalasqan
Brıfıngide qysqy kezeńde avtomobıl joldarynda qaýipsizdikti qamtamasyz etý jáne aldaǵy yqtımal sý tasqyny kezeńine daıyndyq boıynsha qabyldanyp jatqan sharalar aıtyldy. Bıylǵy jylǵy qańtar aıynyń basynda Tótenshe jaǵdaılar departamenti jáne jergilikti atqarýshy organdardyń kúshterimen respýblıkalyq mańyzy bar avtojoldardyń jabyq ýchaskelerindegi beketterden jylytý pýnktterine 261 adam ornalastyryldy, onyń 27-si bala. Oblystyń avtojoldarynda shuǵyl medıtsınalyq kómek kórsetý úshin úsh trassalyq medıtsınalyq-qutqarý pýnkti (Arshaly, Bulandy jáne Jaqsy aýdandarynda) jumys isteıdi, olar shuǵyl jaǵdaılarda jylytý pýnktteri retinde paıdalanylady.
«Qazgıdromet» RMK málimetine sáıkes, aqpan aıynda aýa raıy boljamy negizinen jyly jáne jaýyn-shashyndy bolady dep kútilýde. Aqmola oblysynyń basym bóliginde bir aıda ortasha aýa temperatýrasy qalypty jaǵdaıdan 1°S joǵary bolady dep boljanýda (qalypty jaǵdaı -14, -16). Aqpan aıynda jaýyn-shashyn mólsheri shamamen 10-31 mm bolýy yqtımal. Kóp jyldyq baqylaý derekteri boıynsha aqpan, naýryz jáne sáýir aılarynda jaýyn-shashynnyń aılyq normasy túsýi múmkin, bul qaýipti tabıǵı gıdrometeorologııalyq qubylystardyń týyndaýyna soqtyrady», – dedi Q.Dospaev.
Sonymen birge, ol Aqmola oblysynyń aýmaǵynda tasqyn jáne erigen qar sý basýy múmkin aımaqtarda 13 myńnan astam adam turatyn 17 aýdandaǵy 125 eldi meken, sondaı-aq jalpy uzyndyǵy 33,9 km bolatyn 74 avtomobıl joly (6 respýblıkalyq, 28 oblystyq jáne 40 jergilikti joldarda) jáne 4 temir jol ýchaskesi bar ekenin atap ótti.
TJD basshysy orynbasarynyń aıtýynsha, bıyl oblysta sý tasqynyna daıyndyq ótken jyldyń jaz mezgilinde bastaldy. Eldi mekenderdi ınjenerlik qorǵaý jónindegi josparǵa sáıkes 53 eldi mekende sý burý arnalaryn jaılastyrý, keńeıtý jáne tereńdetý, ózen arnalaryn tazartý, sý burý arnalaryn tazartý, qolda bar topyraq úıip bekitilgen jerlerdi nyǵaıtý jáne ulǵaıtý, bógetterdi jóndeý, topyraq úıip bekitilgen jerlerdi turǵyzý, sý ótkizý qurylystaryn jaılastyrý boıynsha jumystar júrgizildi.
«Bıylǵy jyldyń aqpan aıynan bastap Aqmola oblysynyń eldi mekenderinde sý tasqynyna qarsy aldyn alý is-sharalaryn uıymdastyrý boıynsha aılyq jarııalaý josparlanýda, halyqpen jeke aýlalardy sý basýyna jol bermeý úshin tıisti sharalar qabyldaý týraly túsindirý jumystary júrgiziledi. Departament Aqmola jáne Qaraǵandy oblystary boıynsha «Qazsýsharýashylyǵy» fılıaldarymen sý qoımalarynan (Astana, Sileti, Shaǵalyly, Samarqand, Sherýbaı-Nura jáne Yntymaq) sýdyń joǵary tógilýi týraly aldyn ala habarlaý maqsatynda jedel aqparat almasýdy uıymdastyrdy. Sý tasqynyna daıyndyqqa baılanysty josparly jumystar jalǵasýda. Tasqyn sýlardy apatsyz ótkizý boıynsha barlyq qajetti sharalar qabyldanýda», – dep túıindedi Q.Dospaev.
