Aqmola oblysynda 111 myńnan astam shólmektegi kontrafaktilik alkogol ónimderi tárkilendi
KÓKShETAÝ. QazAqparat - Aqmola oblysynyń memlekettik kirister departamentiniń qyzmetkerleri 111 myńnan astam shólmek kontrafaktilik alkogol ónimderin tárkiledi. Bul týraly atalǵan departamentte ótken dóńgelek ústel barysynda aıtyldy, dep habarlaıdy «QazAqparat» HAA tilshisi.
Aqmola oblysynyń memlekettik kirister departamenti basqarmasynyń basshysy Qonys Jumaǵulovtyń aıtýynsha, ótken jyldyń jumys qorytyndysy boıynsha 3 mıllıon 633 myńǵa jýyq jalǵan baqylaý markasy alynǵan. Oǵan qosa, jalpy quny 6 mıllıon 200 myń shólmek alkogoldik ónim saqtalyp jáne saýdalanǵany, 77 myń lıtr spırt pen alkogoldik ónimderdiń esepke alynbaǵany anyqtaldy.
«Aqmola oblysynda atalǵan sala boıynsha 14 qylmys ashylyp, 111 myń shólmek alkogoldik ónim, 519 jalǵan eseptik-baqylaý markasy jáne 23 myń lıtr spırt tárkilendi. Oǵan qosa, Kókshetaý qalasynda lıtsenzııasyz alkogoldik ónimderdi saqtaý faktisi anyqtaldy. Oqıǵa ornynan jalpy quny 49 mıllıon teńgeden astam 70 myń 450 shólmek alkogoldik ónim anyqtalyp, alyndy», dedi basqarma basshysy.
Sonymen qatar, zańsyz kásipkerlikpen aınalysý jáne salyq tóleýden jaltarýdyń jolyn kesý baǵytynda alkogoldik ónimderdi óndirýshilerge monıtorıng júrgizilip otyrady. Sondaı-aq, oblys aýmaǵyna ózge óńirlerden jetkiziletin alkogoldik ónimderge monıtorıng júrgizilip, jalpy taldaý jasalynady.
Máselen, aǵymdaǵy jyldyń naýryz aıynda ekonomıkalyq tergeý qyzmetiniń qyzmetkerleri Zerendi aýdany aýmaǵynda ruqsat qujatynsyz quny 28 mıllıon teńgeniń 26 myń lıtr etıl spırtin tasymaldaý oqıǵasyn anyqtaǵan.
