Aqmola oblysynda 110 myńnan astam zeınetker turady
KÓKShETAÝ. QazAqparat - Kókshetaýda 1 qazan - Halyqaralyq qarttar kúni aıasynda bir top ardagerler marapattaldy, dep habarlaıdy QazAqparat tilshisi.
Bul joly «Kókshetaý» mádenıet saraıynda uıymdastyrylǵan merekelik sharaǵa barlyq qalalar men aýdandardan el abyroıyna bólengen ardagerler shaqyryldy. Olardy aımaq basshysy Málik Myrzalın quttyqtap, bir top qazynaly qarttarǵa Alǵys hattar men baǵaly syılyqtar tabys etti.
«Ortamyzda júrgen qarııalarymyzdyń eli, halqy, keleshek urpaǵy úshin jasaǵan ıgi isteri erekshe. Qazirgi kezde memleketimizde qarttarǵa erekshe kóńil aýdaryp, jan-jaqty qamqorlyq jasalýda. Qazaqstannyń ósip-órkendeýine, elimizdiń beıbit ómir keshýine óz úlesterin qosqan osy ardaqty da aıaýly qarttarymyz árqashan qurmet tuǵyrynda bolady», - deı kele Málik Myrzalın ardagerlerdi oblysta atqarylyp jatqan jańa zaman úrdisterindegi ıgi isterden habardar etti.
Sonymen qatar, Aqmola oblystyq ardagerler keńesiniń tóraǵasy Ǵosman Tóleǵul da jınalǵan qaýymǵa yqylasty tilegin bildirdi.
«Búgingi tańda oblystyq ardagerler uıymynyń quramynda 111 myńnan astam zeınetkerdi biriktiretin 843 bastaýysh ardagerler uıymy, 2 qalalyq jáne 17 aýdandyq ardagerler keńesi, 68 soǵys ardageri, myńǵa tarta soǵysqa qatysýshylarǵa teńestirilgender, 5570 tyl eńbekkeri, 900-deı Aýǵan soǵysy ardageri, Chernobyl atom elektr stantsııasyndaǵy apatty joıýǵa qatysqan 59 adam bar», - dedi Ǵosman Tóleǵul.
Saltanatty jıyn sońy merekelik kontsertke ulasty.
