Aqmola oblysynda 100-den astam eldi mekendi sý basý qaýpi bar

KÓKShETAÝ. QazAqparat - Aqmola oblysynda kóktemgi yqtımal sý tasqynynyń aldyn alý jumystary júrgizilýde. Búgingi tańda aımaqtyń 100-den astam eldi mekenin sý basý qaýpi bar, dep habarlaıdy QazAqparat tilshisi.

Aýmaqtyq TJD bastyǵynyń orynbasary Qanat Dospaevtyń málimetinshe, oblystyń 17 aýdanyndaǵy 100-den astam eldi meken kóktemgi yqtımal sý tasqynyna qaýipti aýmaqta ornalasqan. Bul eldi mekenderde 13 myńnan astam adam turady. Sonymen birge, sý basý qaýpi bar aımaqta 74 avtomobıl jáne 4 temir jol ýchaskeleri bar. Óńirde muz jarý, qar shyǵarý jáne sý aǵatyn kanaldyq júıelerdi retke keltirý, ınertti materıaldar qoryn jasaý, sý ótkizý qubyryn tazartý boıynsha jumystar júrgizilýde.

«Aýdandar men qalalar boıynsha 227 tonna janar-jaǵar maı (2021 – 273 tonna), 12,7 myń tonna ınertti materıal (2021 – 6,8 myń tonna), 70,8 myń qap (2021-66,7 myń dana) ázirlendi. Sonymen birge, 2153 adam, 983 birlik tehnıka, 151 motopompa, 35 júzý quraldary daıarlandy. Sý tasqyny bola qalǵan kezde tótenshe jaǵdaılar departamentiniń jeke quramynan 445 adam, 84 tehnıka, 12 júzý quraldary jáne 97 motopompa jumyldyrylady. Sý tasqyny kúsheıer bolsa, tótenshe jaǵdaılar departamentiniń qosymsha kúshteri men quraldaryn kóshirý josparlanýda. Sondaı-aq basqa oblystardan kómekke adamdar tartý josparlanǵan», - dedi Qanat Dospaev.