Aqmola oblysynda 100-den asa adam sýdan qutqaryldy
KÓKShETAÝ. QazAqparat - Aqmola oblysynda sýǵa shomylý maýsymy bastalǵannan beri jaǵajaılarda aýmaqtyq TJD men jergilikti polıtsııa qyzmetiniń qyzmetkerleri birlesip 1041 aldyn alý sharasyn ótkizdi. Bul týraly Óńirlik kommýnıkatsııalar qyzmetinde ótken brıfıngte TJD-niń tótenshe jaǵdaılardy joıý bóliminiń basshysy Oleg Malıýk aıty, dep habarlaıdy QazAqparat tilshisi.
O.Malıýktiń aıtýynsha, júrgizilgen sharalar qorytyndysy boıynsha 122 adam ákimshilik jaýapkershilikke tartylǵan.
«Jaýapqa tartylǵan adamdardyń 115-si qoǵamdyq oryndarda alkogoldik ishimdik ishken, 7-ýinde jalpy sýdy paıdalaný erejesin buzǵan bolyp otyr. Bul baǵyttaǵy jumystar odan ári jalǵasýda. Qazirgi kezde, 52 qoǵamdyq baqylaý beketi jumys isteıdi. Oǵan barlyǵy 183 qoǵamdyq qutqarýshylar kiredi. Bıylǵy maýsym kezinde olar 26 adamdy qutqardy», dep atap ótti O.Malıýk.
Sonymen qatar, TJD qutqarýshylary oblystyq bilim, týrızm, dene shynyqtyrý jáne sport basqarmasymen birlesip, balalardy sýda júzýge úıretýde. Bıylǵy jyly 1116 bala sýda júzýdiń qyr-syryn meńgerdi. Sýǵa shomylý maýsymynda qutqarý bólimshelerinde 4 balalar jaǵajaıy jumys istedi. Oǵan qosa, Aqmola oblysynyń bilim basqarmasymen birlesip, orta mektepter men kolledjderdegi muǵalimderge qutqarý boıynsha alǵashqy dárigerlik kómek kórsetý tásilderin oqytý máselesi sheshildi. Kýrstan ótkenderge qoǵamdyq qutqarýshy kýáligi beriledi. Qazirgi kezde oblysta 60-tan astam muǵalim kýrstan ótti.
Jyl basynan beri Aqmola oblysynyń TJD bólimshelerimen sýdan 111 adam, onyń ishinde 22 bala qutqarylsa, 11 adam (onyń ishinde 2 bala) sýǵa batyp ketti. Oblys boıynsha tıisti deńgeıde jaraqtalmaǵan jáne qaýipti sý qoımalarynda adam ólimin aldyn alý baǵytynda 449 tıym salý belgisi ornatylǵan.
