Aqmola oblysynda 10 myń bas iri qaraǵa arnalǵan mal bordaqylaý alańy ashyldy
Aýyl sharýashylyǵy qyzmetkerleri kúni qarsańynda ashylǵan mal bordaqylaý alańy amerıkalyq tehnologııa boıynsha salynǵan jáne óńirdiń eksporttyq áleýetin arttyryp qana qoımaı, ishki naryqtaǵy suranysty da qanaǵattandyrýǵa septigin tıgizbek.
Seriktestiktiń bas dırektory Serikbaı Sadyqovtyń aıtýynsha, qazirgi kezde sharýashylyqta 7,1 myń bas iri qara semirtilýde. 58 adam jumys isteýde. Jumysshylardyń ortasha eńbekaqysy aıyna 167 myń teńgeni quraıdy. Bul árıne, aýyl turǵyndary úshin qyrýar aqsha. Jyl basynan beri 2,9 myń bas mal soıylypty. Kásiporynǵa shyǵarylǵan ónim úshin memleket tarapynan sýbsıdııa da tólenýde.
«Kásiporynǵa 2018 jyly satylǵan ónim úshin 54 mıllıon teńge sýbsıdııa tólendi. Bıyl 135 mıllıon teńge kóleminde memlekettik qoldaýǵa qol jetkizýdi kózdep otyr», – deıdi Serikbaı Sadyqov.
Nysannyń ashylý rásimine qatysqan Aqmola oblys ákiminiń orynbasary Ǵalymjan Ábdihalyqov mal sharýashylyǵy óńirde dástúrli ári tabysy joǵary sala bolyp sanalatynyn atap ótti.
«Óńirimizde sıyr etin óndirýge barlyq múmkindikter jasalǵan. Búgingi mal bordaqylaý alańyn iske qosý arqyly biz oblys boıynsha bir ýaqytta barlyǵy 31,5 myń bas iri qarany semirte alamyz. Bul bizge jyldan jylǵa et óndirisin arttyrýǵa múmkindik beredi», – dedi Ǵalymjan Ábdihalyqov.
Jańadan ashylǵan 10 myń bas iri qaraǵa arnalǵan mal bordaqylaý alańy seriktesikke bir ýaqytta jemdeletin iri qara sanyn 15000-ǵa deıin jetkizýge jáne ishki naryqty jyl saıyn otandyq óndiriste óndirilgen 6 myń tonnadan astam etimen qamtamasyz etýge múmkindik bermekshi.
