Aqmola oblysynda 10 kún sýsyz otyrǵan aýyldarǵa tirshilik kózi qaıta berildi
KÓKShETAÝ. QazAqparat - Aqmola oblysynyń Qorǵaljyn aýdanynda 10 kúnge jýyq ýaqyt sýsyz otyrǵan aýyldar tirshilik kózine qaıta qosyldy, dep habarlaıdy «QazAqparat» HAA tilshisi oblystyq ishki saıasat basqarmasynyń baspasóz qyzmetine silteme jasap.
Apatqa Janteke aýyly mańyndaǵy sý qubyrynyń jarylýy sebep boldy. Saldarynan Qorǵaljyn jáne Maıshuńqyr aýyldary aýyz sýsyz qaldy. Jalpy, Qorǵaljyn aýdanynda qubyr - eki jerden, Egindikól aýdanynda 3 jerden jarylǵan. Jalpy, apatty joıýǵa «Aqmola sý arnasy» kommýnaldyq kásipornynan 15 adam jáne 7 birlik tehnıka, «Órleý» kommýnaldyq kásipornynan 10 adam jáne 3 birlik tehnıka, Aqmola oblystyq TJD jeke quramynan 3 adam jáne 1 arnaıy tehnıka tartyldy.
Nátıjesinde, 25 jeltoqsan kúni keshke aýyldar sý kózine qaıta qosyldy. «Qazirgi kezde, sý jiberý qalypty deńgeıde jumys isteýde», dep kórsetilgen taratylǵan habarlamada.
