Aqmola oblysynda 1 jasar sábıden koronavırýs anyqtaldy
AQMOLA OBLYSY. QazAqparat - Tselınograd aýdanynyń Talapker aýylynda 1 jasar sábıden koronavırýs tabyldy, dep habarlaıdy QazAqparat tilshisi Aqmola oblystyq taýarlar jáne kórsetiletin qyzmetterdiń sapasy men qaýipsizdigin baqylaý departamentine silteme jasap.
Vedomstvonyń málimetinshe, kishkentaı naýqasqa koronavırýs úıindegi týystarynan juqqan, al týystary Nur-Sultan qalasynan juqtyrǵan. Naýqas Aqmola oblysynyń týberkýlezge qarsy dıspanseriniń stantsıonarynda emdeledi», deıdi vedomstvodan.
Vedomstvodan atap ótkendeı, epıdemıologııaǵa qarsy sharalar naýqaspen jáne onymen baılanysty bolǵan adamdardy belgilengen sanıtarlyq-epıdemıologııalyq zertteý boıynsha, bekitilgen algorıtmge sáıkes júrgizilýde.
«Osy kúni óńirdegi statsıonarlarda 167 adam emdelip jatyr. Onyń ishinde ýaqytsha statsıonarda - 18, karantındik – 124, ınfektsııalyq – 25. Úı karantıninde-664 adam. Jalpy, oblys boıynsha barlyǵy 147 adamnyń COVID-19 juqtyrǵany tirkelgen. Onyń ishinde 126 jaǵdaı Tselınograd aýdanynyń úlesinde. Al qalǵany Kókshetaý qalasy, Aqkól, Arshaly, Egindikól, Esil, Shortandy aýdandarynda», - dep tolyqtyrdy vedomstvodan.
Eske sala keteıik, osyǵan deıin habarlaǵanymyzdaı, Tselınograd aýdanynyń Talapker kentinde turatyn santehnıkten koronavırýs tabylǵan bolatyn.
