Aqmola oblysynda 1 jasar sábı jumbaq jaǵdaıda kóz jumdy
KÓKShETAÝ. QazAqparat - Aqmola oblysynda belgisiz jaǵdaıda kóz jumǵan 1 jasar sábıdiń ólimine baılanysty keshendi tekseris júrgizilýde. Bul týraly QazAqparat tilshisine Aqmola oblysynyń qoǵamdyq densaýlyqty qorǵaý deparamenti basshysynyń mindetin atqarýshy Aınagúl Mýsına aıtty.
Naýryzdyń 5-nen 6-na qaraǵan túni jedel járdem qyzmeti tirkegen 2018 jyly týǵan sábıdiń ólimi baqylaýǵa alynǵan. Sábı aıaq astynan kóz jumǵan. Naqtyly ólimniń sebebin anyqtaý úshin ishki ister organdary tarapynan sot - medıtsınalyq saraptama júrgizilýde.
«Belgili bolǵandaı, sábı naýryzdyń 5-i kúni josparly ekpe alǵan. Qazirgi kezde, epıdemıologtar josparly ekpe júrgizilgen emhanada jospardan tys tekseris júrgizýde. Sábıge ekpe tártipke sáıkes júrgizilgen. Ekpe salynardyń aldynda sábıdi dáriger teksergen jáne ekpege qarsy eshqandaı kórsetkish anyqtalmady. Ájesiniń de jazbasha kelisimi bar. Ekpeni bilikti medbıke salǵan jáne medıtsınalyq qadaǵalý júrgizilgen. Nátıjesinde sábıge ekpeniń eshqandaı áseri bolmaǵan»,- deıdi Aınagúl Mýsına.
Onyń aıtýynsha, ekpeniń qoldaný jáne saqtaý merziminde eshqandaı zańbuzýshylyq bolmaǵan.
«Ekpe 2018 jyldan beri qoldanysta, osy kúni 2500 bala osy ekpeni alǵan jáne olardyń breýinde de ekpe alý kezinde asqyný bolǵan joq. Bul oqıǵanyń ekpe egýge esh qatysy joq. Sábıdiń naqtyly ólimi sot-medıtsınalyq saraptama nátıjesi belgili bolǵannan keıin habarlanady», - dep tolyqtyrdy Aınagúl Mýsına.
