Aqmola oblysynda 1 qyrkúıekke deıin 5 mektep paıdalanýǵa beriledi

KÓKShETAÝ. QazAqparat – Aqmola oblysynda 1 qyrkúıekke deıin barlyǵy 2092 oqýshyǵa arnalǵan 5 mektep paıdalanýǵa beriledi. Bul týraly brıfıngte oblystyq bilim basqarmasynyń basshysy Shokan Orazalın málim etti, dep habarlaıdy QazAqparat tilshisi.

Basqarma basshysynyń málimetinshe, 2023 jyly óńirde 101 bilim berý nysanynda kúrdeli jáne aǵymdaǵy jóndeý jumystaryn júrgizý úshin bıýdjetten 9,3 mlrd teńge bólingen, onyń ishinde 44 nysan kúrdeli jóndeýden ótedi.

«Barlyq kúrdeli jáne aǵymdaǵy jóndeýler boıynsha memlekettik satyp alý rásimderi júrgizildi, merdigerler anyqtalyp, jumystardy júrgizýdi uıymdastyrý kesteleri bekitildi. Jóndeý jumystaryn aıaqtaýdy oqý jyly bastalǵanǵa deıin josparladyq. Búginde kúrdeli jóndeýdiń 4 nysany jáne aǵymdaǵy jóndeýdiń 38 nysany boıynsha jumystar aıaqtaldy», - dedi Shoqan Orazalın.

Osy rette, bıyl oblysta 5 552 oryndyq 12 mekteptiń (Qosshy qalasynda 1 200 oryndyq 2 mektep, Shubar aýylynda 300 oryndyq, Ótemis aýylynda 120 oryndyq, Tselınograd aýdany Jańa jol aýylynda 80 oryndyq, Arshaly aýdany Jaltyrkól aýylynda 300 oryndyq, Kókshetaý qalasynda oqý tárbıe kesheni 392 oryndyq, Kókshetaý qalasynda 1200 orynǵa, Stepnogor qalasynyń Bestóbe kentinde 300 orynǵa, Birjan sal atyndaǵy aýdannyń Bulandy aýylynda jáne Sandyqtaý aýdanynyń Petrovka aýylynda 80 orynǵa, Arshaly aýdany Jibek joly aýylynda 300 orynǵa), sondaı-aq Aqkól qalasyndaǵy №4 orta mektep jáne Kókshetaý qalasynyń №4 arnaıy mektep-ınternatyna 2 qosymsha oqý korpýsynyń qurylysy jalǵasyp jatyr.

«Onyń ishinde 1 qyrkúıekke deıin 2 092 oryndyq 5 nysandy, ıaǵnı Tselınograd aýdanynyń Ótemis aýylynda 120 oryndyq mektep, Kókshetaý qalasynda 392 oryndyq oqý tárbıe kesheni, Qosshy aýylynda 1200 oryndyq mektep, Arshaly aýdanynyń Jibek joly aýylynda 300 oryndyq mektep, Aqkól aýdanynyń №4 orta mektebine qosymsha ǵımaratta paıdalanýǵa berý josparda bar. Sonymen birge, jeke menshik ınvestıtsııa esebinen Qosshy qalasynda 1 500 oryndyq mektep paıdalanýǵa berildi. Bul nysandardy iske qosý Qosshy aýylynda jáne Arshaly aýdanynyń Jibek joly aýylynda 3 aýysymdyq oqytý máselesin sheshýge múmkindik beredi», - dep túıindedi Shoqan Orazalın.

Basqarma basshysy atap ótkendeı, bilim berý nysandarynyń qaýipsizdigin qamtamasyz etý boıynsha jumystar da jalǵasyp jatyr. Osy baǵytta 600 mln teńgeden astam qarajy jumsaldy. ıAǵnı, beınebaqylaý júıeleri jańǵyrtylyp, dabyl túımeleri men týrnıketter ornatylǵan.

Aıta ketsek, budan buryn Aqmola oblysynda 24 bilim berý oshaǵynyń qurylysy qolǵa alynǵanyn jazǵan edik.