Aqmola oblysynda 1,5 mlrd teńgeniń astyq saqtaý kásiporny salynýda
KÓKShETAÝ. QazAqparat - Aqmola oblysynyń Jarqaıyń aýdanynda quny 1,5 mıllıard teńgege astyq saqtaý kásipornynyń qurylysy júrgizilýde. Bul týraly aımaq basshysy Sergeı Kýlagınniń aýdanǵa jumys sapary barysynda aıtyldy, dep habarlaıdy «QazAqparat» HAA tilshisi əkimdiktiń baspasóz qyzmetine silteme jasap.
Aımaq basshysy aldymen, aýdan ortalyǵynda ornalasqan «Arka-K» seriktestiginde bolyp, jumys barysymen tanysty. Kásiporyn byltyrǵy jyly qurylǵan. Seriktestiktiń dırektory Elebek Isatov óz sózinde qıyrshyq tas óndiretinderin jáne jylyna 64 myń tonna asfaltbeton qospasy jasalatynyn aıtyp ótti. 150 mıllıon teńgege baǵalanǵan jobanyń búgingi tańda irgetasy qalanyp, qondyrǵylary ornatylǵan. Qazir iske qosylǵan zaýytta jeti adam jumys isteıdi.
Budan keıin Sergeı Kýlagın «Altyn Dán KZ» seriktestiginiń 1,5 mıllıard teńgege baǵalanǵan astyq qabyldaý kásipornynyń qurylysyna nazar aýdardy. Seriktestik dırektory Baqytjan Tileýbaev kásiporyn keleshekte astyq qabyldaý, keptirý, óńdeý, saqtaý tárizdi qoıma jumysymen aınalysatynyn málimdedi. Astyq qabyldaý kásiporny 60 myń tonna astyq saqtaı alady. Onyń ústine 20 myń tonnalyq qosymsha banki ornatylǵan.
Oblys basshysy keńse, zerthana, kireberis, órt sóndirý deposy men kúzet ǵımarattaryn, astyq tıeletin temir jol tuıyǵynyń qurylysyn aralap kórip, jumys qarqynyn údete túsýdi tapsyrdy.
Sapar barysynda aımaq basshysy aýdandaǵy budan ózge de birqatar áleýmettik-óndiristik nysandardyń jumysyna nazar aýdaryp, aýdan aktıvine qatysty.
