Aqmola oblysynan Qostanaıǵa taǵy 50 tonna gýmanıtarlyq kómek jiberildi
«AMANAT» partııasynyń Aqmola oblystyq fılıaly baspasóz qyzmetiniń málimetinshe, Jaqsy, Esil, Zerendi, Sandyqtaý men Jarqaıyń aýdandarynan gýmanıtarlyq kómek tıelgen 11 júk kóligi Qostanaı oblysynyń Áýlıekól aýdanyna attandy. Bul Aqmola oblysynyń qostanaılyqtarǵa jiberip otyrǵan gýmanıtarlyq kómektiń ekinshi legi.
«Osynaý syn saǵatta oblys turǵyndarynyń judyryqtaı jumylyp otyrǵany qýantady. Jalpy, qaıyrymdylyq sharasyna barsha aqmolalyqtar, olardyń qatarynda depýtattar, jergilikti kásipkerler men eriktiler jasaqtary belsendi qatysýda. Gýmanıtarlyq kómekten ózge Qostanaı oblysynda órtten zardap shekkenderge kómek kórsetý úshin qurylǵan Biryńǵaı qoǵamdyq qoryna aqmolalyqtar tarapynan 14,9 mln. teńge aýdaryldy»,- dedi «AMANAT» partııasy Aqmola oblystyq fılıalynyń atqarýshy hatshysy Aına Mysyrálimova.
Partııa fılıalynyń baspasóz qyzmetinen atap ótkendeı, qaıyrymdylyq aktsııasyna «Sandyqtaý Astyq», «Kamenka ı D» seriktestikteri men «Arman», «Bek» jeke kásipkerlik ıeleri, aýyldyq okrýg ákimderi men depýtattar, basqa da partııalastar belsendi qatysyp otyr.
«Órtti aýyzdyqtaýǵa Aqmola oblysynyń Tótenshe jaǵdaılar departamentiniń jeke quramynan 68 adam úles qosýda. Jalpy, qutqarýshylarǵa kómek kórsetý maqsatynda búgin oblystyq máslıhat depýtaty Qaırat Sultanov jeke kóligimen jarty tonna azyq –túlik ónimderin áketti. Sonymen birge, búgin partııanyń «Jastar Rýhy» jastar qanatynyń 20 shaqty múshesi órtten zardap shekkenderge qoldaý kórsetý maqsatynda Qostanaı óńirine attandy», – dedi tolyqtyrdy vedomstvodan.
Aıta ketsek, buǵan deıin Aqmolalyqtar Qostanaıda órtten zardap shekkenderge 15 tonnadan astam gýmanıtarlyq kómek jibergen edi.
