Aqmola oblysynan habar-osharsyz ketken adam urlyq jasap ustaldy
Oblystyq polıtsııa departamenti baspasóz qyzmetiniń málimetinshe, aǵymdaǵy jylǵy qazannyń 17-de Kókshetaý qalalyq polıtsııa basqarmasynyń kezekshi bólimine 59 jastaǵy jergilikti turǵyny habarlasyp, belgisiz bireýlerdiń Áýezov kóshesindegi aýlalardyń birinde shoıyn lıýkti urlap ketkenin aıtty. Shyǵyn somasy 20 myń teńgeni qurady.
«Jedel basqarý ortalyǵynyń beınebaqylaý kameralary arqyly urlyq jasalǵany anyqtaldy. Kameranyń kómegimen patrýldik polıtsııa batalony ekıpajynyń qyzmetkerleri eki kúdiktini izdestirip ustady», - dedi vedomstvodan.
Anyqtalǵandaı, kúdiktilerdiń biri Tselınograd aýdanynyń 19 jastaǵy turǵyny bolyp shyqty. Onyń osy jyldyń 16 qazanynan bastap iz-túzsiz joǵalǵany anyqtaldy.
«Qazirgi ýaqytta urlyq jasaý boıynsha Qylmystyq kodekstiń 188-shi baby negizinde sotqa deıingi tergeý sharalary qolǵa alyndy. Kúdiktilerdiń osyǵan uqsas qylmys jasaýǵa qatystylyǵy tekserilýde», - dep tolyqtyrdy vedomstvodan.