Aqmola oblysyna «Spýtnık Laıt» vaktsınasynyń 4 000 dozasy tústi
Bul týraly jýrnalıstermen ótken brıfıngte Aqmola oblysy Densaýlyq saqtaý basqarmasynyń basshysy Narıman Syzdyqov málim etti, dep habarlaıdy QazAqparat tilshisi.
Basqarma basshysynyń aıtýynsha, Aqmola oblysyna 2021 jyldyń aqpan aıynan bastap barlyǵy bes vaktsınanyń 1 022 585 dozasy ( Spýtnık V – 542 505, QazVak – 109 930, Sinofarm – 259 000 (HayatVax – 61 000, Corona Vak-24000, VeroCell – 174 000) jáne Pfizer vaktsınasynyń 111 150 dozasy túsken. Al bıylǵy jyldyń 21 qańtarynda «Spýtnık Laıt» vaktsınasynyń 4 000 dozasy jetkizildi.
«Qazirgi kezde, ony tasymaldaý kestesi daıyndalyp, oblystyń medıtsına uıymdaryna jetkizilýde», - dedi N.Syzdyqov.
Jalpy, aqpan aıynan bastap Aqmola oblysyna bes vaktsınanyń birinshi komponenti 340 736 adamǵa, ekinshi komponenti 314 913 adamǵa egildi. Pfizer vaktsınasynyń birinshi komponenti 6151 adamǵa nemese tıisti halyqtyń 9,3 paıyzyna egildi. Olardyń ishinde 4 413 jasóspirim, 144 júkti jáne 1 594 bala emizetin áıelder bar. Ekinshi komponentin 3 447 adam nemese 5,2 paıyz aldy. Revaktsınatsııadan 53 092 adam ótti.
Basqarma basshysy atap ótkendeı, búginde qoımalarda vaktsınalar jetkilikti, eshqandaı dúrlikpe joq. Vaktsınatsııany egý pýnktteri bar aımaqtyń barlyq medıtsınalyq uıymdary vaktsınatsııa júrgizedi. Qazirgi kezde óńirde 226,9 myń adam áli vaktsına almaǵan. Vaktsınatsııalanbaǵandardyń 3,7 paıyzy nemese 8 347 adam koronavırýs ınfektsııasyn juqtyrǵan. Osy jyly vaktsınatsııalanǵandardyń ishinen tek 343 adam ǵana juqtyrdy.
«Jansaqtaý bólimshesindegi 36 adamnyń ishinen tek bir ǵana naýqas egilgen. Bul halyqaralyq ǵylymı zertteýler, sondaı-aq barlyq medıtsınalyq uıymdardyń vaktsınatsııalanǵan adamdar aýyr formalarda KVI-men aýyrmaıdy, jansaqtaý bólimshesine túspeıdi jáne KVI-den kóz jumbaıdy degen málimetterin taǵy bir ret rastaıdy. KVI-ǵa qarsy vaktsınatsııa-aýyr haldegi adam úshin tiri qalýdyń jalǵyz úmiti», - dep túıindedi N.Syzdyqov.
