Aqmola oblysyna Soltústik Irlandııadan «Gereford» jáne «Angýs» tuqymdy 566 bas iri qara jetkizildi
ASTANA. 25 qazan. QazAqparat - El Táýelsizdiginiń 20 jyldyq mereıtoıy qarsańynda Aqmola oblysynyń Tselınograd aýdanyna qarasty Lýgovoe aýylyndaǵy «AKA» JShS-ine Soltústik Irlandııadan «Gereford» jáne «Angýs» tuqymdy 566 bas joǵary ónimdi múıizdi iri qara jetkizildi.
Bul aqparatty «Agrarlyq nesıe korporatsııasy» AQ-nyń baspasóz qyzmeti taratyp otyr.
«AKA» JShS-niń quryltaıshysy Qýanyshbek Ahmedınniń atap ótýinshe, asyl tuqymdy mal sharýashylyǵynyń tolyq tsıklin júzege asyrý maqsatynda aǵymdaǵy jyldyń qarasha aıynda taǵy da 250 bas múıizdi iri qara malyn jetkizý josparlanýda. Qazirgi ýaqytta jetkizilgen maldar jergilikti aýa raıyna beıimdelip, oqshaýlaý kezeńinen jaqsy ótýde.
Esterińizge sala keteıik, «AKA» JShS-inde asyl tuqymdy reprodýktıvti sharýashylyǵyn qurý jobasy aǵymdaǵy jyly qolǵa alynǵan bolatyn. «QazAgro» AQ-nyń enshiles kompanııasy «Agrarlyq nesıe korporatsııasy» AQ-y asyl tuqymdy sıyrlar, aýyl sharýashylyǵy tehnıkalaryn, qural-jabdyqtar satyp alý úshin 561,6 mln. teńge bólgen-di. Nesıe jelisiniń syıaqy stavkasy jylyna 6 paıyzben 12 jylǵa berildi.
Reprodýktıvti sharýashylyqtar qurý maqsatynda elimizge jetkizilgen múıizdi iri qaralar negizinen «Gereford» jáne «Angýs» tuqymdaryna jatady. Bul tuqymdar elimizdiń aýa raıyna óte jyldam beıimdelgish bolyp keledi.
Asyl tuqymdy mal sharýashylyqtary jelisin qurý ınvestıtsııalyq baǵdarlamasy aıasynda «Agrarlyq nesıe korporatsııasy» AQ-y 6 sharýashylyqty 6410 mln. teńgege qarjylandyryp otyr.
