Aqmola oblysyna Gollandııadan 99 bas golshtın sıyrlary jetkizildi
KÓKShETAÝ. QazAqparat – Aqmola oblysynyń Zerendi aýdanyndaǵy «Milk Project» JShS Gollandııadan alǵashqy 99 golshtın sıyrlaryn jetkizdi, dep habarlaıdy QazAqparat tilshisi.
Aýdan ákimdiginiń málimetinshe, asyl tuqymdy iri qara Sımferopol aýylyndaǵy «MilkProject» seriktestiginiń 350 sıyrǵa arnalyp salynǵan taýarly-sút fermasyna ornalastyryldy.
«Qazaqstanda teńdesi joq zamanýı tehnologııamen jabdyqtalǵan ferma ótken jyly «Qarapaıym zattar ekonomıkasy» sheńberinde salyndy. Ol úshin seriktestik «Paıyzdyq stavkany sýbsıdııalaý» baǵyty boıynsha ekinshi deńgeıli bankten 300 mıllıon teńge kóleminde nesıe aldy. Bul qarjynyń 200 mıllıon teńgesine taýarly-sút fermasyn ashsa, qalǵan aqshaǵa shetelden asyl tuqymdy iri qara satyp aldy», - deıin ákimdiktegiler.
Fermanyń artyqshylyǵy - munda sıyrlar ıntellektýaldy júıe arqyly basqarylady, ár janýardyń densaýlyǵyna monıtorıng júrgiziledi, bir knopka arqyly «aqyldy júıemen saýylady», mal sharýashylyǵy kesheniniń júıesi biryńǵaı avtomandyrylǵan ortalyq arqyly basqarylady. Bul kompıýterdiń kómegimen kez kelgen parametrdi (saýý deńgeıi, janýardyń jaǵdaıy) álemniń kez kelgen jerinen baqylaýǵa bolady.
Aıta keteıik, osydan 10 jyl buryn Sadovoe aýylynda ashylǵan «MilkProject» JShS-niń sút zaýyty elimizde ozyq tehnologııaǵa negizdele otyryp, sút ónimin óńdeýdegi kásiporyndardyń alǵashqy qarlyǵashy. Zaýyttyń shyǵarylǵan tabıǵı taza sút ónimderi elimizdiń birneshe oblysymen qatar, Reseı naryǵyna da shyǵýda. Búginderi kásiporyn aıaǵynan nyq turyp, Nur-Sultan, Qaraǵandy, Stepnogor, Pavlodar, Qostanaı, Óskemen, Aqtaý, Jezqazǵan, Jańaózen jáne Almaty qalalaryna óz ónimderin turaqty jetkizip keledi.
