Aqmola oblysy: Jazda «Nomads Camp» halyqaralyq kıiz úı lageri ashylady
KÓKShETAÝ. QazAqparat - Mektep oqýshylary «Nomads Camp» halyqaralyq kıiz úı lagerinde qazaq halqynyń salt-dástúri, ádep-ǵurpy, ulttyq taǵamdary, áskerı óneri men qolónershilerdiń sheberlikterimen jaqyn tanysatyn bolady.
Joba bıylǵy jyldyń maýsym aıynda Aqmola oblysynyń Aqkól aýdanynda júzege asyrylady. Bul týraly Aqmola oblysy ákiminiń keńesshisi Marat Iǵalı óziniń Facebook paraqshasynda jazdy dep habarlaıdy QazAqparat tilshisi.
«Uly dala skaýttary Aqmola oblysyndaǵy halyqaralyq kıiz úı lagerine shaqyrady. Sizderge aǵymdaǵy jyldyń maýsym aıynda Aqmola oblysynyń Aqkól aýdanynda «Nomads Camp» halyqaralyq kıiz úı lageri ashylatynyn habarlaǵym keledi», dep jazady Marat Iǵalı.
Onyń sózinshe, bul kıiz úı lageri orta ǵasyrlardaǵy qazaq halqynyń turmysyna uqsas etip jasalynady. Lager ortasynda Uly dala dástúrleri men sol kezdegi zańdarǵa sáıkes handyq bolmaq. Osylaısha, lagerge kelgen ár adam qazaq halqynyń ǵasyrlar boıy qalyptasqan mádenıeti men tarıhyna úńgiletin bolady. Al, balalar bolsa, ózderin sol orta ǵasyrdaǵy kóshpeli halyqtyń bir múshesi retinde tájirıbe júzinde sezine alady.
«Jobany meniń dosym ári tanysym, Qazaqstandaǵy skaýt qozǵalysynyń jetekshisi Ildar Katenov qolǵa almaq. Onyń uıymdastyrýymen sońǵy 25 jylda 10 myń balanyń qatysýymen 100-den astam dala lagerleri men sletter uıymdastyryldy», - deıdi M.Iǵalı.
Aıta ketý kerek, joba Aqmola oblysy ákimdiginiń qoldaýymen júzege asyrylmaq. Ótken jyldyń sońynda Aqkól aýdanynyń Ernazar aýylynda skaýt lageri úshin jer telimi bólindi. Aǵymdaǵy jyldyń maýsym-tamyz aılarynda «Nomads Camp» halyqaralyq kıiz úı lagerinde ár 6 kún saıyn birneshe maýsym ótkizý josparlanǵan. Bir maýsymda 11-17 jas aralyǵyndaǵy 100-150 bala kıiz úı lagerinde demalady. Balalar osyndaǵy kıiz úılerde túnep qana qoımaı, qazaq halqynyń salt-dástúri, ádep-ǵurpy, ulttyq taǵamdary, áskerı óneri men qolónershilerdiń sheberlikterimen jaqyn tanysatyn bolady.
