Aqmola oblysy: Týrızm basqarmasynyń basshysyna qatysty is qozǵaldy
ASTANA. QazAqparat - Bıýdjet qarajatyn talan-tarajǵa saldy degen kúdikpen Aqmola oblystyq týrızm basqarmasy basshysynyń ústinen qylmystyq is qozǵaldy, dep habarlaıdy QazAqparat tilshisi QR Memlekettik qyzmeti isteri jáne sybaılas jemqorlyqqa qarsy is-qımyl agenttiginiń baspasóz qyzmetine silteme jasap.
«Aqmola oblystyq týrızm basqarmasynyń basshysy bıýdjet qarajatyn talan-tarajǵa saldy dep kúdikke ilindi. Sybaılas jemqorlyqqa qarsy is-qımyl ulttyq bıýrosynyń Aqmola oblysy boıynsha departamenti basqarma basshysyna qatysty qylmystyq isti tergeý ústinde», - delingen agenttiktiń habarlamasynda.
Habarlanyp otyrǵandaı, basqarma basshysy jalǵan akti toltyrý jolymen 2018 jyldyń qarasha aıynda kádesyı ónimderin satyp alýǵa bólingen 8,5 mln teńge bıýdjet qarajatyn jymqyrdy dep kúdikke ilingen.
Qazirgi ýaqytta sotqa deıingi tergeý amaldary júrgizilip jatyr.
