Aqmola oblysy: sý tasqynynyń aldyn alý jiti is-qımylymyzǵa baılanysty - TJD basshysy

- Alekseı Sergeevıch, ózen-kólder sýy jaǵalaýdaǵy eldi mekenderge qaýip-qater týdyrmas úshin qandaı sharalar qolǵa alyndy? Jalpy, búgingi jaǵdaı jóninde ne aıtasyz?

  - «Qazgıdromet» memlekettik kásipornynyń boljaýynsha, bıylǵy jyldyń səýir aıynyń alǵashqy onkúndiginiń sońy men ekinshi onkúndiginiń basynda kún kúrt jylynady dep kútilýde. Oblys aýmaǵynda osy kezde sý tasqynynyń qaýpi kúsheıe túsedi. Jalpy, óńirdegi Esil, Sileti, Shaǵalaly, Nura, Kolýton jáne Jabaı ózenderindegi qar mólsheri normadan 1,2-1,9 ese, Astana, Sileti jáne Shaǵalaly sý qoımalaryna aǵyp keletin sý normadan 1-1,9 ese kóp. Sol sebepti Nura, Jabaı, Kolýton, Esil ózenderiniń sý deńgeıi kóterilip, arnasynan shyǵady degen qaýip te joq emes. Ótken jyly oblystyq tótenshe jaǵdaılar departamenti oblys ákimdigimen birge 2017 jyldyń sý tasqynyn apatsyz ótkizý jáne óńirdiń eldi mekenderin ınjenerlik qorǵaý boıynsha sharalar josparyn jasap, oblys ákiminiń birinshi orynbasary bekitken. Osy baǵytta qomaqty qarjy bólinip, aryqtar tazalandy, ózender tereńdetilip, jaǵalaýy bekitildi, dambylar jóndeldi. 13 sý ótkizgish nysany salyndy. Oblystyń qalalary men aýdandarynyń kommýnaldyq kásiporyndary men qyzmetteri eldi mekender ishindegi qardy syrtqa shyǵarýda.

- Kóktemgi sý tasqynyna qarsy qandaı daıyndyq júrgizilýde?

- Kókshetaý men Stepnogorsk qalalary jáne Bulandy, Ereımentaý aýdandarynda 20,9 myń ınerttik materıaldar, 99,3 myń dana qap, 184,9 tonna janar-jaǵarmaı, 16,7 tonna azyq-túlik taǵamdary daıyndalǵan. Birqatar aýdandardyń ákimdikteri ınerttik materıaldar, qap jáne janar-jaǵarmaı satyp alý jumysyn júrgizýde. Tótenshe jaǵdaıda arnaıy medıtsınalyq kómek kórsetý úshin óńirdiń qalalary men aýdandaryndaǵy aýrýhanalardan oryn bólindi, dári-dármek qory jasaldy. Turǵyndar arasynda túsinik jumystary júrgizilýde.

- Osy jumysqa qansha adam, qansha tehnıka tartylýda?

- Oblys aýmaǵyndaǵy jergilikti atqarýshy organdardyń usynǵan málimetine sáıkes, aldaǵy sý tasqyny sharasyna 2588 adam men 1220 tehnıka

 daıyndaldy. Sondaı-aq, Qazaqstan Respýblıkasy Ulttyq gvardııasynyń 5510 áskerı bólimshesi men oblystyq ishki ister departamentinen 485 adam, 103 tehnıka men 5 qaıyq tartý josparlanǵan. Oblys aýmaǵyndaǵy jaǵdaıǵa qaraı, Іshki ister mınıstrligi Tótenshe jaǵdaılar jónindegi komıtetiniń ózge óńirlerdegi bólimshelerinen 461 adam, 66 tehnıka, 16 qaıyq ákelý mejelengen. Kókshetaý jáne Stepnogorsk qalalary men 17 aýdandaǵy jergilikti atqarýshy organnyń qaýlysymen 345 azamattyq qorǵanystyń aýmaqtyq qurylymy quryldy. Qurylymnyń quramyna 3701 adam, 752 tehnıka, quramynda 1452 adamy bar jedel qımyldaıtyn 20 otrıad, 548 avtokólik, tabıǵı jáne tehnogendik tótenshe jaǵdaıdyń saldaryn joıý úshin ınjenerlik jáne arnaıy tehnıkalar kiredi.

- Búgingideı syndarly shaqta bárin sheshetin naqty is-qımyl ǵoı.

 - Aldymen, Astrahan, Atbasar, Bulandy, Esil, Sandyqtaý, Tselınograd jáne Shortandy aýdandarynda sý tasqynyn apatsyz ótkizý maqsatynda eldi mekender men kólik kommýnıkatsııasy úshin sý alý qaýpi bar ózenderde muz jarý jumysy júrgizilýde. Arnaıy brıgadalar kópirler men sý ótkizgish nysandarynyń astyn tazalaýda. Oblys aýmaǵyndaǵy 114 gıdrotehnıkalyq nysan baqylaýǵa alyndy. «Qazgıdromet» memlekettik kásiporny oblystyq fılıalynyń málimeti boıynsha oblys aýmaǵyndaǵy jaǵdaıǵa monıtorıng pen boljaý júrgizý úshin 45 meteostantsııa, 29 gıdrobeketi, 8 kól gıdrobeketi, 21 agrometeobeketi jumys isteıdi. Sondaı-aq, ákimdikter kúshimen jáne oblystyq tótenshe jaǵdaılar departamentiniń aýmaqtyq bólimshelerimen ózenderdiń qaýipti ýchaskelerinde sýdyń deńgeıin baqylaıtyn 90 qosymsha beket táýlik boıy kezekshilik jasaýda. Sondaı-aq, departament sý tasqyny men órt qaýpi týyndaıtyn kezeńde jedel kosmostyq monıtorıngtik aqparat alý jóninde «Qazaqstan Ǵarysh Sapary» Ulttyq kompanııasy» aktsıonerlik qoǵamymen kelisim-shartqa otyrdy. Árıne, sý tasqynynyń qaýpi tóngen shaqta kóp másele bizdiń jiti is-qımylymyzǵa baılanysty. Sol údeden shyǵamyz ǵoı degen úmit bar.

- Áńgimeńizge rahmet.