Aqmola oblysy sý tasqynyna daıyndalyp jatyr
KÓKShETAÝ. QazAqparat - Aqmola oblysynda kóktemgi sý tasqynynyń alýdyn alý maqsatynda naýryzdyń 11-nen bastap, óńirdegi Esil, Nura, Jabaı, Qalqutan, Jylandy tárizdi ózenderdiń betindegi muzdy jarý jumystary júrgizilýde, dep habarlaıdy QazAqparat tilshisi oblystyq TJD baspasóz qyzmetine silteme jasap.
Vedomvstvonyń málimetinshe, muz jarý jumystary naýryzdyń 17-ne deıin oblystyń Atbasar, Esil, Sandyqtaý, Arshaly, Tselınograd, Qorǵaljyn, Astrahan, Shortandy jáne Bulandy aýdandary aýmaǵyndaǵy 70-ten astam ýchaskede júrgiziletin bolady.
«Oblys aýmaǵynda sý tasqynynyń aldyn alý maqsatynda naýryz 11-17 kúnderi aralyǵynda ózenderdiń betindegi muzdy bólý, usaqtaý jáne báseńdetý boıynsha jarylys jumystary júrgiziletin bolady», - deıdi Aqmola oblysy TJD bastyǵynyń orynbasary Qanat Dospaev.
Atbasar aýdanynda sý alý qaýipi bar toǵyz eldi mekende sý tasqynynyń aldyn alý sharalary júrgizildi. Jabaı jáne Esil ózenderine jaqyn ornalasqan Poltavka jáne Samarka aýyldaryndaǵy turǵyn úılerdiń aýlasy topyraq úıindilerimen nyǵaıtyldy. Ózen ańǵary qamys pen shópten, sý aǵyzatyn nysandar qardan tazartylýda. Atbasar qalasynda jalpy bilim birý nysandary aınala qum salynǵan qaptarmen qorshaldy. Sonymen qatar, Sandyqtaý aýdanynda da sý tasqynyn boldyrmaý baǵytynda keń aýqymdy aldyn alý sharalary júrgizilip jatyr.
Aıta keteıik, Aqmola oblystyq TJD deregi boıynsha óńirde tótenshe jaǵdaıdy eskertý jáne joıýdyń oblystyq jáne óńirlik shtabtary qurylyp jumys isteýde. Oblystyń eldi mekenderinen 1 mıllıon 103,4 myń tekshe metr qar shyǵaryldy. Sý tasqynyna 1 921 adam, 979 arnaıy tehnıka, 122 motopompa, 48 júzý quraly daıyndaldy.
QR ІІM bólimshelerinde 524 adam, 111 arnaıy tehnıka, 12 júzgish qural, 107 motopompa bar. Sondaı-aq, ár aýdandaǵy departament bólimsheleriniń 107 motosorǵysy sý tasqyny qaýpi mol aımaqqa jiberiledi.
Budan bólek, oblys aýmaǵyndaǵy sý tasqyny kúsheıgen kezde Tótenshe jaǵdaı komıtetiniń ózge óńirlerdegi 814 adamdy, 161 tehnıkany, 31 júzý quraly men qarjysyn jaǵdaıǵa qaraı paıdalaný qarastyrylyp otyr.
