Aqmola oblysy: Reseıden ákelingen qus ónimderinen ishek taıaqshasy tabyldy
KÓKShETAÝ. QazAqparat - Aqmola oblysynda birqatar azyq-túlik ónimderi talaptarǵa sáıkes bolmaı shyqty, dep habarlaıdy QazAqparat tilshisi oblystyq qoǵamdyq densaýlyqty qorǵaý departamentine silteme jasap.
Іshki naryqty jáne oblys turǵyndaryn sapasyz azyq-túlikten qorǵaý maqsatynda Aqmola oblysynyń qoǵamdyq densaýlyqty qorǵaý departamenti tarapynan azyq-túlik ónimderiniń qaýipsizdigine turaqty túrde monıtorıng júrgizedi.
«Monıtorıng sheńberinde aǵymdaǵy jyldyń qarasha aıynda taǵam ónimderinen 341 synama alyndy. Onyń ishinde tehnıkalyq reglamentter talaptaryna saı kelmeıtin 56 synama anyqtaldy. Taǵam ónimderiniń ishinde talapqa saı kelmegenderi taýyq eti - 26,8 paıyz, et ónimderi - 25 paıyz, kókónis ónimderi - 12,5 paıyz, sút ónimderi - 8,9 paıyz, alkogoldik ónimder - 8,9 paıyz, kondıterlik ónmider - 5,5 paıyz, arpa - 3,5 paıyz, balalar ónimi - 3,5 paıyz, sondaı-aq, alkogolsiz sýsyndar, maı ónimderi 1,8 paıyz boldy», - dep túsindirdi vedomstvodan.
Eń bastysy tehnıkalyq reglamentter talaptarynyń buzylýy tańbalanýda, bul - 64,3 paıyz, qaýipsizdik talaptaryna saı kelmeý - 23,2 paıyz, quramy jáne fızıkalyq-hımııalyq kórsetkishterine - 12,5 paıyz boldy.
«Reseı Federatsııasynda shyǵarylǵan qus ónimderi qaýipsizdik kórsetkishterine saı kelmedi. «O.ıÝ. Smırnov»JK («Kotletnyı», «Rıabýshka» qus etinen jasalǵan jartylaı fabrıkattar), «MPK» «Broılernoe proızvodstvo» №2 ýchastogi JAQ (broıler balapanynyń týralǵan eti) ónimderinde mıkroorganızmderdiń sany kóp ekeni anyqtaldy, sondaı-aq «PRODO Ptıtsefabrıka Sıbırskaıa» AQ («Sýpchık po -domashnemý» eti sylynǵan súıek) óniminen ishek taıaqshasy bary anyqtaldy. Al Jarqaıyń aýdanyndaǵy «Ogonek» dúkeninde alynǵan buqtyrylǵan sıyr etinen («MPK «Salıýt» (RF) shoshqa DNK-sy tabyldy. Japsyrma qaǵazynda ónimniń quramynda shoshqa eti bary kórsetilmegen», - dep atap ótti departament qyzmetkerleri.
Vedomstvonyń deregi boıynsha, SQO shyǵarylǵan «Tamerlan» markaly (TD bogatyrskıı prodýkt «Sever») jáne «Dobraıa» («Radýga»JShS) otandyq fortıfıtsırlengen bıdaı unyna júrgizilgen zertteý nátıjesi talaptarǵa sáıkes bolmaı shyqty.
Sonymen qatar, Aqmola oblysy ortalyǵynda ornalasqan "14" ataýy bar dúkeninde merzimi ótip ketken shujyq ónimderi satylǵany anyqtaldy.
«Tehnıkalyq reglamentter talaptarynyń buzylýy anyqtalǵan barlyq oqıǵa boıynsha satýshylarǵa qatysty jospardan tys tekseris qolǵa alynyp, kemshilikterdi joıý týraly jazba eskertý joldandy», dep tolyqtyrdy vedomstvodan.
Aıta keteıik, oblys boıynsha bıylǵy jyldyń 11 aıynda qujatsyz jáne merzimi ótip ketken ónimderdi taǵamdardy satqan 38 kásipker jaýapkershilkke tartylyp, memleketke 889 myń teńge kiris kirdi. Ákimshilik sotqa 7 is materıaldary joldandy. Nátıjesinde sot kásipkerlerge 1 mıllıon teńgeden astam aıyppul tóledi. Saýdadan 142 keliden astam qaýipti ónim alyndy. Ony 63,6 kelisi shujyq, 39,7 kelisi sút, 26,5 kelisi qus eti jáne 12,7 kelisi balyq ónimderi.
Osyǵan oraı, Aqmola oblysynyń qoǵamdyq densaýlyqty qorǵaý departamenti oblys turǵyndaryn azyq-túlik ónimderin paıdalanǵan kezde saq bolýǵa shaqyrady. Ónimdi satyp almas buryn onyń markırovkasy, japsyrma qaǵazy, syrtqy túri, quramy, shyǵarylǵan kúni, jaramdylyǵy men saqtaý merzimi týraly bilim alýǵa keńes beredi. Eger de sapasyz ónimder anyqtalǵan kezde dereý Aqmola oblysynyń qoǵamdyq densaýlyqty qorǵaý departamentine 8 (7162) 26-55-84 nemese aýmaqtyq basqarmalaryna habarlasýǵa bolady.
