Aqmola oblysy men Ońtústik Koreıa ekijaqty áriptestikti damytýǵa múddeli

KÓKShETAÝ. QazAqparat - Aqmola oblysynyń ákimi Ermek Marjyqpaev óńirge jumys saparymen kelgen Qazaqstan Respýblıkasyndaǵy Ońtústik Koreıanyń Tótenshe jáne Ókiletti Elshisi Kım Desıkpen kezdesti, dep habarlaıdy QazAqparat tilshisi ákimdiktiń baspasóz qyzmetine silteme jasap.

Kezdesýde týrızm, medıtsına, bilim, ІT-tehnologııa, agroónerkásiptik sektor men saýda-ekonomıkalyq múmkindikter keńinen talqylandy.

«Aıta keteıin, búgin Sh.Ýálıhanov atyndaǵy Kókshetaý memlekettik ýnıversıtetinde bolyp, stýdentterge dáris oqydym. Birlesip akademııalyq mobıldilik baǵdarlamasyn damytýǵa bolady. Aqmola oblysy men Ońtústik Koreıa arasynda ekijaqty qatynasty damytýdyń áleýeti joǵary ekenine senimdimin», - dedi Kım Desık.

Óz kezeginde Ermek Marjyqpaev stýdenttermen almasý ıdeıasyn qoldap, bul, ekijaqty qatynasty damytýda mańyzdy ról atqaratynyn atap ótti. Osy rette, aımaq basshysy Aqmola oblysy men Ońtústik Koreıa arasyndaǵy taýar aınalymynyń az ekenin tilge tıek etti.

«Sondyqtan, bizdiń basty maqsatymyz - ekonomıkalyq, kommertsııalyq jobalarmen almasyp, ekijaqqa da paıda keltirý. Káris bıznesmenderin oblysymyzǵa shaqyramyz, osynda naqtyly bir isti qolǵa alatyn bolamyz»,- dedi óńir basshysy.

Osy kúni Qazaqstan halqy Aqmola Assambleıasynyń qoldaýymen Kókshetaýdaǵy «Dostar» mádenıet saraıynda Ońtústik Koreıadan arnaıy kelgen orkestrdiń oryndaýyndaǵy dástúrli koreı mýzykasynyń kontserti ótýde.