Aqmola oblysy men Astana aýmaǵynda joǵary dáldiktegi spýtnıktik navıgatsııa júıesi boıynsha ilki joba iske asyrylady-T. Musabaev

Bul týraly búgin Astanadaǵy «Ǵarysh adamzattyń ıgiligi úshin - bolashaqqa kóz salý» atty halyqaralyq konferentsııa barysynda bolǵan brıfıngte Ulttyq ǵarysh agenttiginiń tóraǵasy Talǵat Musabaev aıtty.

«Jaqyn arada elimizde joǵary dáldiktegi spýtnıktik navıgatsııa júıesi paıda bolady. Biz qazirgi kezde osy júıeni qurýdamyz»,-dedi T. Musabaev. Bıyl bastapqy jumystar iske asyrylatynyn jáne alǵashqy 10 dıfferentsııalanǵan stansany ornatý sharalary bastalatynyn aıtqan ol; «Bul Aqmola oblysy men Astana qalasyndaǵy ilki joba bolady. Al aldaǵy ýaqytta bul júıe Qazaqsannyń barsha óńirine taralady»,-dedi. Osy oraıda ol bul joba boıynsha jumystar Ulttyq ǵarysh agenttiginiń jaýapkershiliginde ekenin atap ótti.

Sonymen qatar «Qazaqstan Ǵarysh sapary» Ulttyq kompanııasy» AQ-nyń prezıdenti Ǵabdýllatıv Myrzaqulovtyń aıtýynsha, bul jobany ótken jyldyń jeltoqsanynan EATS atty nemis fırmasy iske asyrýdy bastaǵan kórinedi. Jobanyń ózin-ózi aqtaý merzimi - 8 jylǵa sozylmaq. Atap aıtqanda, alǵashqy 10 stansa bıylǵy jyldyń ortasyna deıin iske qosylady dep kútilýde. Bul ilki joba Aqmola jáne Almaty oblystarynda iske asyrylady, sondaı-aq osy júıe tolyǵymen 2012 jyldyń aıaǵyna qaraı paıdalanýǵa berilmek.

L.N. Gýmılev atyndaǵy Eýrazııa ulttyq ýnıversıtetinde ótip jatqan atalǵan konferentsııa jumysyna Qazaqstannyń, Reseıdiń, Frantsııanyń, Germanııanyń, Ýkraınanyń, Japonııanyń ulttyq ǵarysh agenttikteriniń, ǵarysh salasyndaǵy kásiporyndarynyń, konstrýktorlyq bıýrolarynyń, joǵary oqý oryndary men akademııalyq ınstıtýttarynyń jáne ǵylymı uıymynyń ókilderi qatysýda. Konferentsııa jumysy «XXI ǵasyr zymyran-ǵaryshtyq tehnıkasy jáne ǵaryshtyq tehnologııa», «Ǵaryshtyq ǵylymı zertteýler jáne eksperımentter», «Ǵaryshtyq materıaltaný jáne aspap jasaý» atty taqyryptardaǵy úsh sektsııada ótedi.