Aqmola oblysy: Mektep pen kolledjderdegi mýzeılerde 32 myńnan astam jádiger bar
KÓKShETAÝ. QazAqparat - Aqmola oblysyndaǵy mektepter men kolledjderdegi mýzeılerde 32 myńnan astam mýzeı jádiger bar, dep habarlaıdy QazAqparat tilshisi oblystyq bilim basqarmasynyń bas mamany Marına Lıge silteme jasap.
Basqarmanyń bas mamany mektep mýzeılerin damytý boıynsha óńirlik ınnovatsııalyq alańnyń jumysy týraly aıtyp berdi.
«Mektep mýzeılerin damytý boıynsha óńirlik ınnovatsııalyq joba óńirdegi barlyq bilim berý uıymdaryndaǵy mýzeı keńistigin damytýǵa baǵyttalǵan. Oqýshylardy otansúıgishtikke, patrıotızmge tárbıelep, azamattyq sana men joǵary adamgershilik qassıeti qalyptastyrýda mýzeı bilim-tárbıede úlken áleýetke ıe», deıdi Marına Lı.
Onyń aıtýynsha, joba arqyly mektepterdegi bilim keńistiginde mýzeı qozǵalysyn damytýǵa, oqýshylardyń zertteýshilik jumystarǵa beıimdiligin arttyrýǵa, balalardyń shyǵarmashylyq múmkindikterin qoldaýǵa, qazaq halqynyń mádenıetine degen qyzyǵýshylyǵyn arttyrýǵa, ótken urpaqtyń adamgershilik qundylyqtaryn qurmetteýge jaǵdaı jasaý kózdelgen.
«Mýzeı kóp eńbekti qajet etedi. Ony ashý úshin ólketaný jáne arheologııalyq salada jumys isteýiń qajet. Oqýshylardyń kópshiligi izdestirý-jınaqtaý jumystaryna, arheologııalyq ekspedıtsııa jáne ǵylymı-zertteý ólketaný jobalaryna qatysady. Osynyń arqasynda mekteptegi mýzeıler sany jyldan jylǵa artyp keledi. Máselen, 2017 jyly Aqmola oblysyndaǵy mektepter men kolledjderde barlyǵy 194 mýzeı bolsa, 2018 jyly - 215, qazir onyń sany 237 mýzeıge jetti. Al, olardyń barlyǵynda 32 myńnan astam jádiger bar», deıdi Marına Lı.
Aıta keteıik, Aqmola oblysynyń Aqkól, Jarqaıyń jáne Jaqsy aýdandarynda mektepterdiń barlyǵynda 100 paıyz mýzeı bar. Onyń ishinde Jaqsy aýdanyndaǵy 3 mýzeıdi tsıfrlandyrý jumystary júrgizilýde. Sonymen qatar, bıylǵy jyly oblystaǵy barlyq mýzeılerdiń tólqujattary jasalynatyn bolady.
Foto: 716.kz
