Aqmola oblysy qurylys salasynda joǵary nátıjelerdi baǵyndyrdy
KÓKShETAÝ. QazAqparat - Aqmola oblysynyń ákimi Málik Myrzalınniń tóraǵalyǵymen kezekti ákimdik májilisi bolyp ótti, dep habarlaıdy QazAqparat tilshisi.
Atalǵan jıynda Aqmola oblysynyń 2017 jylǵy áleýmettik-ekonomıkalyq damýynyń qorytyndylary jáne 2018 jylǵa arnalǵan mindetter men oblys bıýdjetiniń ótken jylǵy atqarylýynyń qorytyndylary týraly máseleler qaraldy.
Məjiliste aıtylǵandaı, oblys boıynsha ótken jyly qol jetken kórsetkishter jaman bolǵan joq.
Oblystyq ekonomıka jáne bıýdjettik josparlaý basqarmasynyń basshysy B.Málǵajdarovtyń sózine qaraǵanda, ónerkásip salasynda birqatar ilgerileýshilikter baıqaldy. Sóıtip, 545,5 mıllıard teńgeniń ónimi óndirildi. Bul - taýar óniminiń jospary 100,2 paıyz oryndaldy degen sóz. Qurylys salasynda da joǵary nátıjelerge qol jetti. Turǵyn úı qurylysy boıynsha memlekettik baǵdarlamanyń 115 paıyzǵa iske asyrylýy sonyń aıǵaǵy. Aýyl sharýashylyǵy salasynda da jalpy alǵanda, jyl tabysty boldy deýge bolady. Dıqan úmiti aqtalyp, astyq táýir shyqty. Bul saladaǵy jańashyldyq dep oblys boıynsha 35 aýyl sharýashylyǵy kooperatıviniń qurylǵanyn aıtqan jón. Osynyń esesinen ónim óńdeý 5 paıyzǵa ósti. Bıyl da osyndaı 28 kooperatıv qurý kózdelip otyr.
Budan keıin qarjy basqarmasynyń basshysy T.Bóltenov baıandama jasady. Ol ótken jylǵy oblystyq bıýdjettiń oryndalýy týraly aıtty.
Oblys ákimi óziniń qorytyndy sózinde áleýmettik-ekonomıkalyq damý máseleleri basty nazarda ekendigin eske saldy.
