Aqmola oblysy karantındi qalaı eńserip keledi
Іndetten kóptegen adam aýyryp, biraz adam kóz jumdy. Osy rette, Aqmola oblysy karantındi qalaı eńserip keledi, QazAqparat tilshisi óńirdegi koronavırýs jaǵdaıyna sholý jasap kórdi.
Elimizde Tótenshe jaǵdaı 2020 jyldyń 15 naýryzynda jarııalanǵany belgili. Ol kezde Aqmola oblysynda KVI jaǵdaılary áli tirkele qoıǵan joq edi. Sol kezde koronavırýs ınfektsııasy týraly aqparattardy turǵyndar ártúrli qabyldady. Bireýler kúmánmen qarasa, endi biri saqtyq sharalaryna kóńil bóldi. Degenmen, sáýir aıyna qaraı aımaqta KVI juqtyrǵandardyń sany arta bastady. Olardyń basym kópshiligi Nur-Sultan qalasynyń irgesindegi eldi mekenderderdiń turǵyndary, naýqas týystarymen baılanysty bolǵandar. Oblysta koronavırýsten qaıtys bolý oqıǵasy elordanyń janyndaǵy «Shapaǵat» áleýmettik qyzmet kórsetý ortalyǵynda tirkeldi. Al, resmı statıstıkalyq málimet boıynsha 9 sáýirdegi oblystyń statsıonarlarynda 371 naýqas, úı karantıninde 792 adam boldy. 11 mamyrdan bastap Aqmola oblysynda birqatar karantın jeńildikteri engizildi. Óńir turǵyndaryna mindetti túrde maska kıip, turǵylyqty jerinen 22:00-ge deıin shyǵýǵa ruqsat etildi. 21:00-ge deıin saıajaıǵa barý úshin eldi mekenge kirýge jáne shyǵýǵa ruqsat etildi, qoǵamdyq kólik saǵat 07:00-den 20:00-ge deıin jumys istedi. Tselınograd aýdanynyń Qosshy jáne Qoıandy aýyldaryna jeńildik bolǵan joq. 14 maýsymda Aqmola oblysynyń bas sanıtarlyq dárigeri Aınagúl Mýsına aqmolalyqtarǵa jedel málimdeme jasady. Onda oblystyń bas sanıtarlyq dárigeri oblys ortalyǵynda KVI-ge qatysty jaǵdaı nasharlaǵanyn aıtty. Sondyqtan 15 maýsym kúni saǵat 20:00-den bastap Kókshetaý qalasynyń perımetri boıynsha 7 blokpostyń jumysy qaıta jandandy, azyq-túlik jáne turmystyq hımııa ónimderin satatyn saýda obektileriniń, azyq-túlik emes dúkenderdiń, sport obektileriniń, qoǵamdyq tamaqtandyrý kásiporyndarynyń jumysy shekteldi. 23 maýsymda Aqmola oblysynda karantındik sharalar kúsheıtildi. Kókshetaý men Stepnogor qalalarynan shyǵatyn jáne kiretin blokpostardy ornatýdan basqa, statsıonarlarǵa josparly emdeýge jatqyzý, skrınıngter jáne kásibı tekserý toqtatyldy. Kókshetaý men Stepnogordegi tamaqtaný obektileri jazǵy alańdardy qospaǵanda, azyq-túlikti jetkizýde ǵana jumys istedi. Kókshetaý men Stepnogordegi avtobýs marshrýttarynyń, avtovokzaldar men avtostantsııalardyń qyzmeti toqtatyldy. Keıin indet órshı tústi. Ólim-jitim kóbeıip, naýqastardyń sany artty. Maýsym-shilde aılarynda aýrý shyńyna jetti. Óńirde ınfektsııa juqtyrǵandardyń sany artty. Jedel járdem shaqyryp, aýrýhana jetý úshin kóp kútý kerek boldy. Keıbir adamdar óz kóliktermen naýqas týystaryn aýrýhanaǵa jetkizýge tyrysty. Biraz adam kóz jumdy. Dárigerler sońǵy kúshi sarqylǵansha jumys istedi. Sonymen, qaýipti vırýspen kúreske eshkim daıyn emes ekeni belgili boldy, demek, dári-dármekter, tósek-oryn, qorǵanys quraldary, medıtsınalyq qyzmetkerler jetispeı dárigerler de, naýqastarda qıyndyqqa tap boldy.
Keıin jaǵdaı birshama turaqtala bastady. Tek 18 qyrkúıekte Aqmola oblysynyń bas memlekettik sanıtarlyq dárigeri qaýlyǵa birqatar ózgerister engizdi. Atap aıtqanda, Aqmola oblysy eldi mekenderiniń aýmaǵy boıynsha turǵyndardyń qozǵalysyn saǵat 23:00-den saǵat 06:00-ge deıin shekteıtin sanıtarlyq postar alyndy. Sondaı-aq, demalys kúnderi 65 jastan asqan adamdarǵa shyǵýǵa ruqsat etildi. Qyrkúıek aıynda KVI jaǵdaıy turaqtandy. Kóp uzamaı KVI-diń ekinshi tolqynyna aýqymdy daıyndyq bastaldy.
16 qazannan bastap Aqmola oblysynda vırýs juqtyrǵandardyń kóp sanynyń tirkelýine baılanysty shekteý karantındik sharalary qaıta kúsheıtildi. Turǵyndarǵa 23:00-den 06:00-ge deıin qozǵalys shekteldi, oıyn-saýyq mekemeleriniń qyzmeti toqtatyldy, saýda úıleri men azyq-túlik emes dúkenderdiń jumysy jumys kúnderi 19:00-ge deıin shekteldi, demalys jáne mereke kúnderi jumys istemedi. Jumys kúnderi bazarlar 17:00-ge deıin ashyldy, demalys kúnderi de jumys istemedi. Azyq-túlik dúkenderi halyqqa 09:00-den 22:00-ge deıin qyzmet kórsetti. Sol kezde óńirdiń bas memlekettik sanıtarlyq dárigeri aǵymdaǵy jyldyń maýsym jáne shilde aılarymen salystyrǵanda jaǵdaı salystyrmaly túrde turaqty ekenin, biraq aýrýdyń birtindep ósýi júrip jatqanyn atap ótti. Ol qyrkúıektiń aıaǵynan bastalyp, qarasha aıynda indettin bıik shyńy bolatyny boljanyp otyrǵandyǵyn atap ótti.
«Oblys aýmaǵynda qyrkúıek aıynda koronavırýs juqtyrýdyń 98 jaǵdaıy tirkeldi, onyń 55-niń belgisi bar, 43-niń belgisi joq. Qazan aıy áli aıaqtalǵan joq, bizde 92 jaǵdaı bar. Siz tek salystyryp kórseńiz. Qyrkúıek aıy boıy 98 jaǵdaı tirkelse, qazan aıynyń 20 kúninde 92 jaǵdaı boldy!.... Esińizde bolsyn, bizde 15 maýsymda oblys boıynsha 115 jaǵdaı boldy, al 1 shildede, ıaǵnı 2 aptadan keıin 1200 jaǵdaı boldy! Eger biz qazir sanıtarlyq talaptardy kúsheıtpesek nemese shektemesek, onda sol kezdegi jaǵdaı qaıta oryn alýy múmkin. Iıa, biz aýrýhanalardy daıyndadyq, dári - dármekter men qajettiniń bárin satyp aldyq. Biraq bul arqany keńge salýǵa bolady degensóz emes», - degen bolatyn spıker.
Aýyrǵandar sany boıynsha Kókshetaý qalasy kósh bastap tur. KVI-diń alǵashqy tolqynynda jumys istegen úsh zerthananyń sany altaýǵa jetkizildi. Jańa jabdyq koronavırýstiń belgilerin tez anyqtap, ýaqyt únemdeýge múmkindik berdi.
7 qarashada karantın sharalaryn qatańdatý týraly kezekti qaýly kúshine endi. Aımaqtaǵy epıdemıologııalyq jaǵdaı turaqsyz dep baǵalandy. Aqmola oblysynyń eldi mekenderiniń aýmaǵynda turǵyndardyń júrip-turýyna 21:00-den 6:00-ge deıin, azyq-túlik dúkenderiniń jumys rejımine 09:00-den 20:00-ge deıin, taksı qyzmetteriniń júrip-turýyna 21:00-den 06:00-ge deıin, adamdardyń úılerine 21:00-ge deıin jetýi úshin barlyq kásiporyndardyń qyzmetine 19:00-ge deıin shekteý engizildi. Qoǵamdyq kólik saǵat 8:00-den 20:00-ge deıin jumys istedi.
5 qarasha. Osyǵan baılanysty Kókshetaý qalasynyń perımetri boıynsha alty sanıtarlyq beket ornatyldy. Bul termometrııany qoldana otyryp, keletin jáne ketetin azamattardyń densaýlyq jaǵdaıyn baqylaýǵa, sondaı-aq barlyq syrqattanǵan jáne baılanysta bolǵan adamdardyń derekteri engiziletin arnaıy qosymshanyń arqasynda karantındik rejımderdi buzýshylardy anyqtaýǵa múmkindik beredi.
13 qarashadan bastap Aqmola oblysy karantındik sharalardyń jańa qatańdatylýyn kútti. Jańa qaýlynyń basty aıyrmashylyǵy PTR ádisimen COVID-19 testileýiniń teris nátıjesi bar anyqtamasyz Aqmola oblysynda turmaıtyn adamdardyń Kókshetaý qalasynyń karantındik aımaǵyna kirýine tyıym salý boldy. Anyqtamanyń qalaǵa keler aldynda úsh kún buryn jasalýy talap etildi. Alaıda, aqmolalyqtarǵa oblys boıynsha júrip-turýǵa mundaı anyqtamalar qajet bolmady.
18 qarashada Aqmola oblysynda KVI aýrýy boıynsha epıdemıologııalyq jaǵdaıdyń turaqtandyrylyp kele jatqandyǵy baıqaldy. Óńir indettin taralý qaýpi boıynsha «jasyl aımaqqa» ótti. 11-17 qarasha aralyǵynda COVID-19 juqtyrýdyń 258 jaǵdaıy tirkeldi (100 myń adamǵa shaqqanda – 35), ótken aptada – 271 jaǵdaı (100 myń adamǵa shaqqanda 36,7). ıAǵnı, 1,05 ese tómendedi, al ósimi kórsetkishi 0,9 paıyz boldy. Kezekti qaýlyǵa birqatar ózgerister engizildi. Onyń ishinde azyq-túlik dúkenderiniń jumysy saǵat 7:00-den 20: 30-ǵa deıin uzartyldy. Saýda-oıyn saýyq ortalyǵynyń, saýda obektileriniń, azyq-túlik emes dúkenderdiń, jabyq azyq-túlik jáne azyq-túlik emes bazarlardyń qyzmeti jeksenbi kúni jumysqa tyıym salýdy saqtaı otyryp, jumys kúnderi saǵat 10:00-den 20:30-ǵa deıin uzartyldy. Bes kúnnen keıin oblys «qyzyl» aımaqqa ótti.
Aqmola oblysynyń bas memlekettik sanıtarlyq dárigeriniń jańa qaýlysyna sáıkes, 28 qarashadan bastap Kókshetaý men Stepnogor qalalaryna shyǵýǵa jáne kirýge tyıym salyndy. Kóp uzamaı Kókshetaý qalasyna Zerendi aýdanynyń jáne jaqyn mańdaǵy eldi- mekenderdiń turǵyndaryna «Stopcorona» saıtynda jumys ornyn kórsete otyryp jáne kirý qajettiliginiń sebebin rastaı otyryp, kirýge ruqsat etildi.
4 jeltoqsandaǵy jaǵdaı boıynsha oblysta 905 ınfektsııalyq jáne 84 reanımatsııalyq tósegi bar 12 ınfektsııalyq statsıonar jumys isteıdi. Qosymsha 14 rezervtik statsıonar, ıaǵnı 990 ınfektsııalyq tósek oryn jáne 103 reanımatsııalyq tósek oryn jabdyqtalǵan. Oblystyń medıtsınalyq uıymdarynda 425 ÓJJ apparaty bar, onyń 203 portatıvti. Budan bólek, 1000-nan astam pýlsoksımetr, 50 ottegi ballony, úsh ottegi stantsııasy satyp alyndy. Jedel medıtsınalyq kómek mashınalary parki tolyqtaı jańartyldy.
Keıin oblys «sary» aımaqqa ótti. Kókshetaý men Stepnogor mańyndaǵy sanıtarlyq postar 12 jeltoqsan saǵat 00:00-den bastap alyndy. Barlyq turǵyndarǵa, ásirese 65 jastan asqan adamdarǵa, endi qajet bolmasa, 23:00-den 06:00-ge deıin turǵylyqty jerinen ketpeý usynylady. 16 jeltoqsanda Aqmola oblysynda saýda úıleri men ortalyqtarynyń, sondaı-aq bazarlardyń jumysyna birqatar jeńildikter engizildi.
Qazirgi kezde oblys «sary» aımaqta. Aqmola oblysynda búgingi kúni barlyǵy 6573 KVI aýrýy tirkelgen, onyń ishinde 59 – y sońǵy táýlikte. 92 adam qaıtys boldy. Jaǵdaıdyń odan ári qalaı damıtynyn ýaqyt kórsetedi. Degenmen, oblysta sanıtarlyq talaptar áli de erekshe baqylaýda. Óńirde koronavırýs ınfektsııasynyń taralýyna qatysty jaǵdaı turaqty.