Aqmola oblysy: Barlyq ózenderde sýdyń qaýipti deńgeıge kóterilýi boljandy
KÓKShETAÝ. QazAqparat - Aqmolalyqtar qardyń kúrt erýi men ózender sýynyń kóterilýine ázirlenýde. Bul týraly óńirlik kommýnıkatsııalar qyzmetinde ótken brıfıngte Aqmola oblysynyń TJD bastyǵy Alekseı Sovetov aıtty, dep habarlaıdy QazAqparat tilshisi.
TJD bastyǵynyń aıtýynsha, oblys boıynsha 10 aýdandaǵy ózenderde 15 myń sharshy metr aýmaqta muz jarý jumystary júrgizildi. Eldi-mekenderden 437 tekshe metr qar syrtqa shyǵaryldy.
««Qazgıdromet» RMK málimeti boıynsha ótken jylmen salystyrǵanda bıyl qar kóp túsken. Sol sebepti, oblys aýmaǵyndaǵy barlyq ózderde sýdyń deńgeıi qaterli shebine deıin kóteriletini boljanyp otyr», - deıdi Alekseı Sovetov.
Brıfıngte aıtylǵandaı, ótken jyly jaz jáne kúz aılarynda eldi mekenderdi sý basý qaýpiniń aldyn alý jáne bıylǵy jyly apatty boldyrmaý sharalaryn júzege asyrý baǵytynda aıtarlyqtaı jumystar atqarylǵan. Sý basý qaýipi bar eldi mekenderdi qaterden saqtaý boıynsha josparǵa sáıkes 12 aýdannyń 43 eldi-mekenderinde sý tasqynynyń aldyn alýǵa arnalǵan ınjenerlik-qorǵanys is-sharalary júzege asyrylǵan. Onyń ishinde, 96 shaqyrym sý ótkizgish aryqtar men temirjol jáne respýblıkalyq, jergilikti maqsattaǵy joldardyń boıyndaǵy 2601 sýaǵyzý nysany keńeıtilip, tereńdetildi, 13,5 shaqyrym bógetterdi jóndeý jáne nyǵaıtý jumystary júrgizildi, 1,3 shaqyrym qaýipti aýmaqtarǵa topyraq úıindileri men bógetter turǵyzyldy. Aýdandar boıynsha, 227 tonna janar-jaǵarmaı, 14 myń tonna ınertti materıal, 72 dana qap ázirlendi.
«Sý tasqynynyń qateri Astrahan, Atbasar, Arshaly, Sandyqtaý jáne Tselınograd aýdandarynda saqtalady. Barlyq óńirlerde shtab qurylyp, táýlik boıy jaǵdaıdy baqylaýda ustaýda jáne monıtorıng júrgizýde. Sondaı-aq, jergilikti organdar tarapynan qajetti kúshter men qarajat daıyndaldy. Oblys boıynsha 2 462 adam men 1321 birlik tehnıka jasaqtaldy. Onyń 692 ınjenerlik tehnıka, 374 turǵyndar men olardyń múlkin qaýipsiz jerge kóshirýge arnalǵan tehnıka, 161 maldy tasymaldaýǵa arnalǵan tehnıka, 94 sýsorǵysh tehnıka, 131 motopompa jáne 45 sýda júzý quraly», -dep tolyqtyrdy Alekseı Sovetov.
Budan bólek, QR ІІM TJK respýblıkanyń ózge óńirlerinen kómekke 814 adam men 161 arnaıy tehnıka jáne 31 sýda júzý quralyn ázirlep otyr.
Aýa raıy boljamdaryna sáıkes naýryzdyń 18-nen bastap oblystyq azamattyq qorǵanys júıesi joǵary daıyndyq rejımine kóshti.
