Aqmola oblysy aýmaǵyndaǵy ózenderde muz jarý jumystary júrgizilýde
ASTANA. QazAqparat - Aqmola oblysynda Esil, Sileti, Shaǵalaly, Nura, Kolýton jáne Jabaı ózenderindegi qar mólsheri ádettegiden 1,2-1,9 ese kóp, al Astana, Sileti jáne Shaǵalaly sý qoımalaryna aǵyp keletin sý ádettegiden 1-1,9 ese artyq.
Sondyqtan, Nura, Jabaı, Kolýton, Esil ózenderiniń sý deńgeıi kóterilip, arnasynan asýy da ǵajap emes. Osy baǵytta qomaqty qarjy bólinip, aryqtar tazalandy, ózender tereńdetilip, jaǵalaýy bekitildi, dambylar jóndeldi. 13 sý ótkizgish nysany salyndy. Oblys qalalary men aýdandarynyń kommýnaldyq kásiporyndary, qyzmetteri eldi mekender ishindegi qardy syrtqa shyǵarýda.
Kókshetaý men Stepnogorsk qalalary jáne Bulandy, Ereımentaý aýdandarynda 20,9 myń ınerttik materıaldar, 99,3 myń dana qap, 184,9 tonna janar-jaǵarmaı, 16,7 tonna azyq-túlik taǵamdary daıyndalǵan. Birqatar aýdandardyń ákimdikteri ınerttik materıaldar, qap jáne janar-jaǵarmaı satyp alý jumysyn júrgizýde.
Aldaǵy sý tasqyny sharasyna 2588 adam men 1220 tehnıka daıyndaldy. Sondaı-aq, Qazaqstan Respýblıkasy Ulttyq gvardııasynyń 5510 áskerı bólimshesi men oblystyq ishki ister departamentinen 485 adam, 103 tehnıka men 5 qaıyq tartý josparlanǵan. Oblys aýmaǵyndaǵy jaǵdaıǵa qaraı, Іshki ister mınıstrligi Tótenshe jaǵdaılar jónindegi komıtetiniń ózge óńirlerdegi bólimshelerinen 461 adam, 66 tehnıka, 16 qaıyq ákelý mejelengen. Kókshetaý jáne Stepnogorsk qalalary men 17 aýdandaǵy jergilikti atqarýshy organnyń qaýlysymen 345 azamattyq qorǵanystyń aýmaqtyq qurylymy quryldy. Qurylymnyń quramyna 3701 adam, 752 tehnıka, quramynda 1452 adamy bar jedel qımyldaıtyn 20 jasaq, 548 avtokólik, tabıǵı jáne tehnogendik tótenshe jaǵdaıdyń saldaryn joıý úshin ınjenerlik jáne arnaıy tehnıkalar kiredi.
Aldymen, Astrahan, Atbasar, Bulandy, Esil, Sandyqtaý, Tselınograd jáne Shortandy aýdandarynda sý tasqynyn apatsyz ótkizý maqsatynda eldi mekender men kólik kommýnıkatsııasy úshin sý alý qaýpi bar ózenderde muz jarý jumystary júrgizilýde. Arnaıy brıgadalar kópirler men sý ótkizgish nysandarynyń astyn tazalaýda. Oblys aýmaǵyndaǵy 114 gıdrotehnıkalyq nysan baqylaýǵa alyndy. «Qazgıdromet» memlekettik kásiporny oblystyq fılıalynyń málimeti boıynsha oblys aýmaǵyndaǵy jaǵdaıǵa monıtorıng pen boljaý júrgizý úshin 45 meteostantsııa, 29 gıdrobeketi, 8 kól gıdrobeketi, 21 agrometeobeketi jumys isteıdi. Sondaı-aq, ákimdikter kúshimen jáne oblystyq tótenshe jaǵdaılar departamentiniń aýmaqtyq bólimshelerimen ózenderdiń qaýipti ýchaskelerinde sýdyń deńgeıin baqylaıtyn 90 qosymsha beket táýlik boıy kezekshilik jasaýda.
