Aqmola oblysy aýmaǵynda birneshe jolda kólik qozǵalysyna shekteý qoıyldy
NUR-SULTAN. QazAqparat – Boranǵa baılanysty Aqmola oblysy aýmaǵyndaǵy joldardyń ýchaskelerinde kólik qozǵalysyna shekteý qoıyldy, dep habarlaıdy QazAqparat tilshisi.
QR Indýstrııa jáne ınfraqurylymdyq damý mınıstrliginiń málimetinshe, búgin saǵat 11:45-ten bastap kelesideı avtomobıl joldarynda kóliktiń barlyq túrleri úshin qozǵalysqa shekteý engizildi:
1. «Nur-Sultan-Petropavl» avtojolynyń 18-231 shaqyrymynda, atap aıtqanda, Nur-Sultan men Şýchınsk qalalary aralyǵyndaǵy ýchaskede («QazAvtoJol» UK» AQ Aqyly joldar dırektsııasynyń ýchaskesi)
2. «Kókshetaý-Atbasar» avtojolynyń 0-184 shaqyrymynda, Kókshetaý men Atbasar qalalarynyń aralyǵyndaǵy ýchaskede.
3. «Ekaterınbýrg-Almaty» avtojolynyń 997-1247 shaqyrymynda, ıaǵnı Atbasar jáne Nur-Sultan qalalarynyń aralyǵyndaǵy ýchaskede.
«Apatty jaǵdaılardy boldyrmaý maqsatynda kólik ıelerine alys saparǵa shyqpaýǵa keńes beriledi. Qıyn jaǵdaıǵa tap bolsańyzdar, 1403 nómiri boıynsha táýlik boıy jumys isteıtin call-ortalyqqa habarlasa alasyzdar», - delingen vedomstvo málimetinde.
