Aqmola oblysy alǵashqy 800 tonna undy BAÁ-ge jetkizdi

KÓKShETAÝ. QazAqparat  - Aqmola oblysy 800 tonna unnyń alǵashqy kommertsııalyq partııasyn Birikken Arab Ámirlikterine jetkizdi. Bul týraly aımaq basshysynyń keńesshisi Marat Iǵalı Feısbýktegi paraqshasynda jarııalady, dep habarlaıdy QazAqparat tilshisi.

Marat Iǵalıdiń málimeti boıynsha Aqmola oblysynyń ákimi Málik Myrzalın Dýbaıdyń saýda-ónerkásiptik palatasynyń shtab páterinde osy uıymnyń basshysymen kezdesti.

«Kezdesýde Aqmola oblysynda shyǵarylatyn undy BAÁ jetkizý máselesi sóz boldy. Qazaqstandyq 800 tonna unnyń (onyń 640 tonnasy birinshi sort jáne 160 tonnasy joǵary sort)  alǵashqy kommertsııalyq partııasyn «INTER TRADE» JShS aǵymdaǵy jyldyń osy naýryz aıynda jetkizdi», - dep atap ótti M. Iǵalı.

Arabtardyń pikirinshe, aqmolalyq un joǵary sapasymen ǵana emes, ekologııalyq jaǵynan tazalyǵymen erekshelenedi. Osy rette, aqmolalyq unnyń  MEMST 26574-85 jáne ISO 9001-2009 standartyna saı bolyp otyrǵanyn aıta ketken jón.

Kezdesý qorytyndysy boıynsha taraptar ekijaqty yntymaqtastyqty odan ári damytý týraly kelisimge keldi. Aldaǵy ýaqytta qazaqstandyq undy BAÁ-ne Aqmola oblysyndaǵy ózge de taýar óndirýshilerde jetkizetin bolady.

Eske salaı keteıik, Dýbaıdyń saýda-ónerkásiptik palatasy 1965 jyly jergilikti bıznesti qorǵaý jáne qoldaý maqsatynda qurylǵan bolatyn. Sonymen qatar, Málik Myrzalınniń BAÁ sapary barysynda Aqmola oblysynda ınvestıtsııalyq park qurý máselesi de sóz boldy.