Aqmola oblysy ákiminiń qabyldaýyna 300-ge jýyq adam keldi

KÓKShETAÝ. QazAqparat - Aqmola oblysynyń ákimi Ermek Marjyqpaev jeke máselesimen kelgen azamattardy qabyldaý kúnin ótkizdi, dep habarlaıdy QazAqparat tilshisi.

Qabyldaýǵa oblys ákiminiń orynbasarlary, oblystyq departamentter men basqarmalardyń basshylary, Kókshetaý qalasynyń ákimdigi, quqyq qorǵaý organdary, kommýnaldyq qyzmetter, azamattarǵa arnalǵan úkimet korporatsııasy men Nur Otan partııasy jáne ekinshi deńgeıli bankterdiń basshylary qabyldady.

Jalpy, bul kúni qabyldaýǵa oblystyń ár aýdanynan 300-ge jýyq turǵyn keldi. Onyń 91-i tikeleı oblys ákimi Ermek Marjyqpaevqa jolyǵyp, saýalyn qoıdy.

Suraqtardyń deni baspanamen qamtamasyz etý, turǵyn úı qurylysy úshin jer telimin alý, kásipkerlik jáne agroónerkásip keshenderin qoldaý boıynsha memlekettik baǵdarlamaǵa qatysý, joldardy jóndeý, Kókshetaý qalasyndaǵy apatty turǵyn úı men abattandyrýǵa, sportty damytý, sý basyp ketý qaýpi bar eldi mekenderge qatysty máselelerdi kóterdi. Suraqtardyń birazy sol jerde sheshilise, qalǵany baqylaýǵa alyndy.

«Memleket basshysy Qasym-Jomart Toqaevtyń bastamasymen qolǵa alynǵan «Halyq únine qulaq asatyn memleket» tujyrymdamasyn júzege asyrý sheńberinde úshinshi ret osyndaı ashyq esik kúnin ótkizip otyrmyz. Tórt saǵattyń ishinde 300-ge jýyq adamdy qabyldadyq. Onyń úshten birin osy jerde sheshtik. Aıyna bir ret osyndaı qabyldaý ótkizip turýymyz kerek», - dedi aımaq basshysy.