Aqmola oblysy 2 mln tonnadan astam astyq eksporttady
KÓKShETAÝ. QazAqparat – Elimizdegi astyqtyń úshten birin óndiretin Aqmola oblysynda óndirispen birge, eksport kólemi artyp keledi. Sońǵy jyldary oblysta astyq eksportynyń kólemi 80 paıyzǵa artqan, dep habarlaıdy QazAqparat tilshisi.
Oblystyq aýyl sharýashylyǵy basqarmasynyń málimetinshe, Aqmola oblysy elimizdegi agrarly óńir sanalady.
Respýblıkadaǵy astyqtyń úshten biri Aqmola oblysynda óndiriledi. Jyl saıyn 2-2,5 mıllıon tonna astyq eksportqa shyǵarylady.
Aqmolalyq astyq negizinen Reseı, Qytaı, Orta Azııa, Eýropa, Taıaý Shyǵys elderiniń naryǵyna shyǵarylady.
«Búgingi tańda oblystaǵy elevatorlarda 2 mıllıon tonnadan astam astyq saqtalǵan. Oblysta egin oraǵy oıdaǵydaı aıaqtalyp, ár gektardan 11,8 tsenterden astyq alǵanda barlyǵy 5,2 mıllıon tonna astyq jınaldy. Alynǵan astyqtyń 90 paıyzy 3-klasty», - deıdi oblystyq aýyl sharýashylyǵy basqarmasynyń bólim basshysy Medet Dosjanov.
«QTJ-Júk tasymaly» aktsıonerlik qoǵamy oblystyq fılıalynyń málimetinshe, óńirlerden astyqty vagondarǵa tıep, jedel jóneltý boıynsha turaqty baqylaý sharalary júrgizilýde.
Bıyl óńirdiń astyq qabyldaý kásiporyndarynan 2,1 mıllıon tonna astyq jáne 165,2 myń tonna un eksportqa jóneltildi.
