Aqmola oblysy 2 mln tonna astyq eksporttady
KÓKShETAÝ. QazAqparat - Aqmola oblysynda 2 mıllıon tonnaǵa jýyq astyq eksporttaldy. Bul týraly oblystyq aýyl sharýashylyǵy basqarmasy basshysynyń orynbasary Dımash Talaspaev aıtty, dep habarlaıdy QazAqparat tilshisi.
Basqarma basshysy orynbasarynyń aıtýynsha, oblysta sharýashylyqtardyń ozyq tehnologııany paıdalanýy, alymdylyǵy joǵary sheteldik tehnıkalardy qoldanýy osylardyń bári egin shyǵymdylyǵyn arttyryp, oraqty neǵurlym qysqa merzimde ótkizýge ıgi yqpalyn tıgizdi. Oblys boıynsha 4,3 mıllıon gektar egistik alqapqa dándi jáne burshaq daqyldary sebilip, 5,6 mıllıon tonna astyq jınaldy. Osynyń arqasynda oblystyń eksporttyq qýaty artyp otyr.
«Qazirgi kezde oblys alys-jaqyn shetelderge 2 mıllıon tonnaǵa jýyq kólemde astyq eksporttap otyr. Onyń 1907,9 myń tonnasy shetelge, 492,6 myń tonnasy respýblıka ishine shyǵaryldy. Jyl sońyna deıin taǵy 950 myń tonna astyq jóneltý josparda bar», - dep atap ótti Dımash Talaspaev.
