Aqmola oblystyq fılarmonııasyna Úkili Ybyraıdyń esimi berildi
Klassıkalyq halyq mýzykasynyń tanymal ókilderiniń biri, sýyryp salma aqyn, belgili ánshi - Úkili Ybyraı Sandybaıuly kedeı sharýa otbasynda týǵan. Ol qazaqtyń ataqty ánshi-aqyndary Arystan, Orynbaı, Shal aqyn, Segiz seri, Tezekbaı, Shóje, Nurkeı, Birjan sal, Aqan serilerdiń ánderin, aıtystaryn el arasynda taratyp, mynaý Birjannyń, mynaý Aqannyń dombyrany qoldaryna alǵandaǵy óz yrǵaǵy, óz qulaq kúıi dep, árqaısysyn óz áýezimen, óz áýenimen, sarynymen oryndap bere alǵan.Úkili Ybyraıdyń halyq arasynda keń taraǵan «Gákký» áni shyǵarmashylyǵynyń shyńy bolyp tabylady. Onyń ánderi názik, taza mahabbat sezimine, tereń oıǵa toly.Týǵan eli Ybyraıdy óz júreginde saqtap, keıbir ánderin halyq áni dep, keıbirin áldekimdiki dep alyp qalǵan. Bul kúnderi ánderi ózine qaıtarylyp jatyr. Mine endi Kókshe topyraǵynda dúnıege kelgen halyq kompozıtory, bulbul ánshi, sýyryp salma aqyn Úkili Ybyraıdyń esimi Kókshetaýdaǵy Aqmola oblystyq fılarmonııasyna berilip otyr.
