Aqmola oblysynyń jabyq joldarynda 1400-den asa adam qalyp qoıdy

ASTANA. KAZINFORM — Aqmola oblysynyń jabyq joldarynda 100-den astam polıtseı qyzmetkeri júrgizýshilerdiń qaýipsizdigin qamtamasyz etedi, dep habarlaıdy Polisia.kz.

Qazirgi ýaqytta óńirde avtojoldyń 10 ýchaskesinde qozǵalysqa shekteý qoıyldy: Astana — Ereımentaý — Shiderti, Astana — Petropavl, Ekaterınbýrg — Almaty — Arshaly aýdanynyń aýmaǵy, Astana — Qabanbaı batyr — Nura — Temirtaý, Kókshetaý — Atbasar, Ekaterınbýrg — Almaty, Qostanaı — Áýlıekól –Sýrǵan, Jezqazǵan — Petropavl, Şýchınsk –Zerendi jáne Astana — Qorǵaljyn.

— Aýa raıyna baılanysty departamenttiń saptyq qurylymynyń jeke quramy kúsheıtilgen rejımde jumys isteıdi. Patrýldik polıtsııa ekıpajdary jol-kólik oqıǵalaryn boldyrmaý jáne júrgizýshilerdi eskertý boıynsha qajetti sharalardy qabyldaýda. Halyqaralyq, respýblıkalyq jáne oblystyq mańyzy bar trassalarda 50 avtopatrýl qyzmet atqarady, bul 100-den astam polıtsııa qyzmetkeri, — delingen habarlamada.

Yqtımal tótenshe jaǵdaılardy boldyrmaý jáne qarly tutqynda qalmaý úshin Aqmola oblysynyń polıtsııa departamenti júrgizýshilerdi joǵaryda atalǵan baǵyttarǵa barmaýǵa jáne joldardaǵy jaǵdaı týraly resmı habarlamalardy qadaǵalaýǵa shaqyrady.

Aıta ketý kerek, qazir jabyq joldarda 700-ge jýyq avtokólik pen 1400-den astam adam qaldy. Polıtseıler azamattar men kólik quraldarynyń qaýipsizdigin táýlik boıy qamtamasyz etetin bolady.

Sonymen qatar, polıtsııa qyzmetkerleri belsendi azamattarǵa, «Lıder.kz» jáne «Jastar resýrstyq ortalyǵyna» erekshe alǵysyn bildirdi, olar jolda qalyp qoıǵandardy ystyq shaı men tamaqpen qamtamasyz etip jatyr. Polıtseıler tek birlesken kúsh-jiger tabıǵattyń kez kelgen qıyndyqtaryn jeńýge kómektesetinin atap ótti.

Buǵan deıin habarlaǵanymyzdaı, boranǵa baılanysty Qazaqstannyń 11 oblysynda joldar jabyldy.