Aqmola oblysynyń úsh eldi mekeni aýyl retinde bólinip shyqty
ASTANA. KAZINFORM – «Ashyq NQA» portalynda Aqmola oblysy ákimdiginiń óńirdiń aýmaqtyq qurylysyndaǵy ózgerister týraly qaýly jobasy jarııalandy.
«Aqmola oblysynyń ákimdigi qaýly etedi jáne Aqmola oblystyq máslıhaty sheshim qabyldady:
«Tselınograd aýdanynyń Qarajar aýyly Tselınograd aýdany Qaraótkel aýyldyq okrýginiń quramynan shyǵarylyp, jeke ákimshilik-aýmaqtyq birlik bolyp;
Tselınograd aýdanynyń Qajymuqan aýyly Tselınograd aýdany Talapker aýyldyq okrýginiń quramynan shyǵarylyp, jeke ákimshilik-aýmaqtyq birlik bolyp;
Tselınograd aýdanynyń Ybyraı Altynsarın aýyly Tselınograd aýdany Talapker aýyldyq okrýginiń quramynan shyǵarylyp, jeke ákimshilik-aýmaqtyq birlik bolyp qurylsyn», - delingen qujatta.
Sondaı-aq, quramynan atalǵan eldi mekender derbes bólinip shyqqan aýyldyq okrýgterdiń de ákimshilik mártebesi ózgertilmek.
«Tselınograd aýdanynyń Aqmol aýyldyq okrýgi Tselınograd aýdany Qaraótkel aýyldyq okrýgi Jańajol aýylynyń quramyna qosylyp;
Tselınograd aýdanynyń Qaraótkel aýyldyq okrýgi jeke ákimshilik-aýmaqtyq birlik retinde Tselınograd aýdanynyń Qaraótkel aýylyna;
Tselınograd aýdanynyń Talapker aýyldyq okrýgi jeke ákimshilik-aýmaqtyq birlik retinde Tselınograd aýdanynyń Talapker aýylyna ózgertilsin.
Osy Aqmola oblysy ákimdiginiń birlesken qaýlysy men Aqmola oblystyq máslıhatynyń sheshimi alǵash resmı jarııalanǵannan keıin kúntizbelik on kún ótken soń qoldanysqa engiziledi», - dep jazylǵan qaýly jobasynda.
Qujattyń túsindirme jazbasynda derbes bólinip shyqqan eldi mekenderge jalpy sıpattama berilgen.
Onda Qajymuqan aýylynyń Astana qalasynan 13 shaqyrym jerde ornalasqany, kóshe-jol jelisiniń uzyndyǵy – 41,6 shaqyrym (asfalt-5,6 shaqyrym) (qıyrshyqtas-shaǵyltas jabynymen - 3 shaqyrym, qara joldar – 33 shaqyrym) ekeni, aýyldaǵy úıler peshpen jylytylatyny, sýmen jabdyqtaıtyn 3 biriktirilgen blok modýl jumys isteıtini, barlyq baspanalar jeke turǵyn úı ekeni aıtylǵan. Elektrmen 3 jeke transformatorlyq stansa qamtamasyz etedi. 594 oqýshysy bar 1 memlekettik orta mektep, 140 oryndyq memlekettik balabaqsha bar. Qajymuqan aýlynyń feldsherlik ambýlatorııalyq pýnktide 1658 adam tirkelgen.
Ybyraı Altynsarın aýyly Astana qalasynan 5 shaqyrym jerde ornalasqan. Kóshe-jol jelisiniń uzyndyǵy – 30,7 shaqyrym (asfalt-14,2 shaqyrym, qıyrshyqtas-shaǵyltas jabynymen – 7,8 shaqyrym, qara joldar – 8,7 shaqyrym).
Aýyldyń turǵyn úı – kommýnaldyq sharýashylyǵy – peshpen jylytý, ortalyqtandyrylǵan sýmen jabdyqtaý, Tselınograd Sý Arnasy ShJQ MKK qyzmet kórsetedi, barlyq baspanalar - jeke turǵyn úıler. Elektrmen 20 memlekettik jáne 3 jeke TTQS qamtamasyz etiledi.
548 oqýshysy bar 1 memlekettik orta mektep, 140 oryndyq memlekettik balabaqsha bar. Ybyraı Altynsarın aýlynyń FAP-inde 849 adam tirkelgen.
Qarajar aýyly Astana qalasynan 3 shaqyrym jerde ornalasqan. Kóshe-jol jelisiniń uzyndyǵy – 48,3 shaqyrym (asfalt-41,4 shaqyrym, qara joldar – 6,9 shaqyrym).
Aýyldyń turǵyn úı – kommýnaldyq sharýashylyǵy – peshpen jylytý, ortalyqtandyrylǵan sýmen jabdyqtaý, Tselınograd Sý Arnasy ShJQ MKK qyzmet kórsetedi, barlyq baspanalar - jeke turǵyn úıler.
Elektrmen jabdyqtaý 5 memlekettik jáne 4 jeke TTQS qamtamasyz etiledi. 508 oqýshysy bar 1 memlekettik orta mektep, 170 oryndyq 2 jekemenshik balabaqsha bar. Qarajar aýlynyń FAP-inde 2543 adam tirkelgen..
