Aqmola oblysynyń turǵyny ulynyń jazasyn jeńildetý úshin alaıaqqa 10 mıllıon teńge bergen

KÓKShETAÝ. KAZINFORM — Aqmola oblysy Aqkól aýdanynyń quqyq qorǵaý organdary asa iri kólemdegi alaıaqtyq isti tergep jatyr.

Aqmola oblystyq polıtsııa departamentiniń habarlaýynsha, Aqkól aýdanynyń turǵyny polıtsııaǵa 10 mıllıon teńgesin alaıaq qoldy qylǵany týraly habarlap, aryzdanǵan.

Jábirlenýshiniń aıtýynsha, ol ómir boıyna bas bostandyǵynan aıyrylǵan balasyna quqyqtyq kómek kórsetý úshin zańgerdiń keńesin almaq bolǵan.

— Ol dostary men týystary arqyly belgisiz er adammen baılanysqa shyqqan. Kúdikti oǵan bilikti quqyqtyq qorǵaý uıymdastyryp, ómir boıyna bas bostandyǵynan aıyrý jazasyn belgili bir merzimge aýystyrýǵa yqpal ete alatynyna sendirgen. Ol kórsetken qyzmeti úshin 10 mıllıon teńge aqy talap etken. Jábirlenýshi qajetti somany jınap, kúdiktiden zańdy qyzmet kórsetkeni týraly qolhat alyp, jeke ózi tapsyrǵan, — dep túsindirdi departamenttiń baspasóz qyzmeti.

Alaıda, er adam alǵan aqshasyn óz paıdasyna jumsaǵan: nesıelerin ótep, qaryzdaryn berip, kólik satyp alǵan. Alaıda, ol ýáde etilgen qyzmetti kórsetpeı, kóp uzamaı baılanysqa shyǵýdy toqtatty.

Jábirlenýshi kómek surap polıtsııaǵa habarlasqan. Tártip saqshylary oqıǵaǵa qatysty sotqa deıingi tergeý jumystaryn bastady.

— Azamattardy qyraǵy bolýǵa jáne aqyly túrde sot sheshimderine yqpal etýge ýáde bergenderge senbeýge shaqyramyz. Barlyq zańgerlik kómek boıynsha tek ýákiletti jáne lıtsenzııasy bar mamandarǵa habarlasýlaryńyzdy suraımyz, — dedi polıtsııa qyzmetkerleri oblys turǵyndaryna.

Aqmola oblysyndaǵy alaıaqtyq is boıynsha burynǵy dırektor sottaldy.