Aqmola oblysynyń turǵyny alaıaqtarǵa 20 mln teńgege aldanyp qaldy

KÓKShETAÝ. KAZINFORM — Aqmola oblysynyń turǵyny alaıaqtarǵa 20 mln teńgege aldanyp qalǵan, dep habarlaıdy Polisia.kz.

Aqmola oblysynyń 60 jastaǵy turǵyny ınvestıtsııalarmen baılanysty eń kóp taralǵan alaıaqtyq shemalardyń biriniń qurbany boldy. Orta mektepte jumys isteıtin muǵalim alaıaqtarǵa úsh aı ishinde jınaqtaryn kóbeıtý maqsatynda 20 mıllıon teńgeden astam qarjy jibergen.

Tergeý barysynda belgili bolǵandaı, osy jyldyń tamyz aıynda jábirlenýshi Instagram jelisinen aqsha kóbeıtý jarnamasyn kórgen. Habarlandyrýda olar aqsha salýdan joǵary paıda tabýǵa bolatynyn aıtyp, silteme arqyly qarapaıym tirkeýden ótýdi usynǵan.

Saıtqa kirgennen keıin jábirlenýshi jeke kabınet quryp sodan keıin «qarjylyq keńesshiler» dıvıdendter alý úshin turaqty aýdarymdardy oryndaýǵa sendire otyryp, onymen belsendi túrde baılanysa bastady. Úsh aı ishinde áıel 50 aýdarym jasaǵan. 

— 24 qarashada jábirlenýshi alaıaqtyqtyń qurbany bolǵanyn túsinip, polıtsııaǵa júgindi. Ótinish boıynsha qylmystyq is qozǵalyp, qajetti is-sharalar júrgizilip jatyr, — delingen aqparatta.

 Kıberpolıtseıler atap ótkendeı, jalǵan ınvestıtsııalarmen baılanysty alaıaqtyqtar Qazaqstanda keń taralǵan alaıaqtyqtardyń biri bolyp qala beredi.

— Alaıaqtar áleýmettik jelilerde jarnamany paıdalanady, iri kompanııalardyń atyn jamylyp, tez tabys tabýǵa ýáde beredi. Mundaı aldaýdyń qurbany bolmas úshin quqyq qorǵaý organdary árdaıym aqparat kózin tekserip, belgisiz keńesshilerdiń nusqaýy boıynsha aqsha aýdarmaýǵa jáne jeke málimetterin bermeýge keńes beredi, — dep qosty aqparattyq medıa-portal.

Aıta keteıik, Túrkistan oblysynda ınternet alaıaqtar 70 mln teńgeden asa qarajat jymqyrǵan.